یہ حکومت ناجائز کے ساتھ نااہل اورنالائق ہے:مولانا فضل الرحمان

تفصیلات کے مطابق مولانا فضل الرحمان کا کہنا تھا کہ پی ٹی آئی حکومت کو توسیع پی ڈی ایم کے باعث نہیں بلکہ کسی اور وجہ سے ملی ہے،تحریک انصاف کی نااہلی پاکستان کی تاریخ کا حصہ بن چکی ہے۔

سربراہ پی ڈی ایم کا کہنا تھا کہ ہم سڑکوں پر آکر اسے آشکار نہ کرتے تو یہ کبھی تاریخ کا حصہ نہیں بنتی،دھاندلی کی پیداوار حکومت اگر ہمیں انتخابی اصلاحات دے تو یہ قیامت کی نشانی ہے۔ حیرت ہے کہ پی ٹی آئی حکومت کو جرات ہورہی ہے کہ وہ ملک کو شفاف انتخابات کا قانون دے۔

ان کا کہنا تھا کہ ہماری سیاسی تاریخ میں کئی اکتوبر اور کئی جولائی آئے، اس حوالے سے ہماری قوم سخت جان ہے،بارہ اکتوبر، ملک میں آئین کی حکمرانی اور منتخب حکومت کو تسلیم نہ کرنا کیسے ملک سے وفاداری ہے۔

انہوں نے کہا ہے کہ قانون کسی ایک فرد کے لئے نہیں بنایا جاتا ،آرڈیننس لاکرحکومت  اپنی سہولت  کیلئےقانون سازی کررہی ہے، یہ قانون سازی ایک اچھی مثال نہیں، بعض افراد کو نوازنے کے لئے قانون سازیاں کی جارہی ہیں۔ 

مولانا فضل الرحمان کا کہنا تھا کہ بدقسمتی سے ہمارے ملک میں ایسی قانون سازیاں ہوتی ہیں جس کے باعث بین الاقوامی دنیا میں ہماری عدالتوں کے فیصلے بطور نزیر بھی پیش نہیں کیئے جاسکتے۔

ان کا مزید کہنا تھا کہ بلوچستان میں حکومت کے اپنے لوگوں کی بغاوت نے صورتحال گھمبیر کردی ہے، ظاھر ہے اپوزیشن اس سے فائدہ اٹھائے گی۔