وزارت آئی ٹی نےنئے سوشل میڈیا رولز 2021 کا نوٹیفکیشن جاری  کردیا

تفصیلات کے مطابق وفاقی  وزیر آئی ٹی  امین الحق نے کہا ہے کہ  ترمیم شدہ رولز کے تحت صارفین کو آرٹیکل 19 کے تحت اظہار رائے کی مکمل آزادی ہوگی، صارفین اور سوشل میڈیااداروں کے مابین رابطوں کیلئے رولزاہم کردار ادا کریں گے، سوشل میڈیا کمپنیوں کو پاکستانی قوانین اور سوشل میڈیا صارفین کے حقوق کی پاسداری کرنا ہوگی۔

 وفاقی وزیر آئی ٹی نے کہا کہ  انتہا پسندی، دہشت گردی، نفرت انگیز، فحش اور پرتشدد مواد کی لائیو اسٹریمنگ پر پابندی ہوگی، سوشل میڈیا ادارے پاکستان کے وقارو سلامتی کیخلاف مواد ہٹانے کے پابند ہوں گے، اخلاق باختہ اور فحش مواد کی تشہیر بھی قابل گرفت جرم ہوگا۔

امین الحق کا کہنا تھا کہ سوشل میڈیا ادارے اور سروس پرووائیڈرز کمیونٹی گائیڈ لائنز تشکیل دیں گے، گائیڈ لائنز میں صارفین کو مواد اپ لوڈ کرنے سے متعلق آگاہی دی جائے گی،  کسی بھی شخص سے متعلق منفی مواد اپ لوڈ نہیں کیا جائے گا،  دوسروں کی نجی زندگی سے متعلق مواد پر بھی پابندی ہوگی، پاکستان کے ثقافتی اور اخلاقی رجحانات کے مخالف مواد پر پابندی ہوگی، بچوں کی ذہنی و جسمانی نشونما اور اخلاقیات تباہ کلرنے سے متعلق مواد پر پابندی ہوگی۔

وفاقی وزیر نے کہا کہ  یو ٹیوب، فیس بک، ٹک ٹاک، ٹوئٹر، گوگل پلس سمیت تمام سوشل میڈیا ادارے رولز کے پابند ہوں گے، نوٹیفیکشن کے اجراء کے بعد سوشل میڈیا اداروں پر جلد از جلد پاکستان میں دفاتر قائم کرنا لازم ہوگا،  سوشل میڈیا کمپنیاں پاکستان کیلئے اپنا مجاز افسر مقرر کریں گی۔