شہباز شریف کا بھارتی آبدوز کا بروقت سراغ لگانے اور پاکستانی حدود سے مار بھگانے پر پاک بحریہ کو خراج تحسین

تفصیلات کے مطابق پاکستان مسلم لیگ (ن) کے صدر اور قائد حزب اختلاف شہباز شریف  نے  بھارتی آبدوز کا بروقت سراغ لگانے اور پاکستانی حدود سے مار بھگانے پر پاک بحریہ کو خراج تحسین پیش کیا ہے۔شہباز شریف نے کہا ہے کہ  ایک مرتبہ پھر پاک بحریہ نے اپنی پیشہ ورانہ مہارت، ہوشیاری اور ارض پاک کی سمندری حدود کے تحفظ کے لیے ہمہ وقت تیار ہونے کی صلاحیت کا لوہا منوایا ہے، تاریخ گواہ ہے کہ پاکستان کی آرمی، فضائیہ اور بحریہ نے ارض وطن کے تحفظ کے لئے ہمیشہ شجاعت اور پیشہ ورانہ صلاحیتوں کا مظاہرہ کیا ہے ۔

اپوزیشن لیڈر شہباز شریف کا کہنا تھا کہ  قوم اپنی بحریہ کی پیشہ وارانہ تیاری اور چوکسی کو خراج تحسین پیش کرتی ہے ، غیر معمولی صلاحیت اور پیشہ وارانہ تیاری کا مظاہرہ کرنے والے افسران اور عملے کے لئےانعام اور اعزازات کا اعلان کیا جائے۔

قبل ازیں پاک بحریہ نے بھارتی سب میرین کی پاکستانی سمندری حدود میں داخل ہونے کی کوشش ناکام بنادی تھی ۔ 

آئی ایس پی آر کے مطابق بھارتی سب میرین نے سولہ اکتوبر کو پاکستانی سمندری حدود میں داخل ہونے کی کوشش کی تھی ، مگر پاک بحریہ بے بھارتی عزائم خاک میں ملادیے ۔ 

آئی ایس پی آر کے مطابق پاک بحریہ نے بھارتی سب میرین کو پیشہ وارانہ مہارت پاکستانی سمندری حدود میں داخل ہونے سے روک کر بھارتی عزائم خاک میں ملادیے ہیں ۔