نگران وزیر خارجہ جلیل عباس جیلانی نے کہا ہے کہ بین الاقوامی قانون 5 اگست 2019 کے بھارت کے یکطرفہ اور غیرقانونی اقدامات کو تسلیم نہیں کرتا، بھارتی سپریم کورٹ کی طرف سے عدالتی توثیق کی کوئی قانونی اہمیت نہیں ہے۔

اسلام آباد میں پریس کانفرنس کرتے ہوئے جلیل عباس جیلانی نے کہا کہ عالمی قانون 5 اگست 2019 کا غیر قانونی اقدام تسلیم نہیں کرتا، بھارتی سپریم کورٹ کی عدالتی توثیق کی قانونی اہمیت نہیں، لہٰذا پاکستان بھارتی سپریم کورٹ کے فیصلے کو مسترد کرتا ہے۔

International law doesn't recognize India’s unilateral and illegal actions of 5 August 2019. The judicial endorsement by the Indian Supreme Court has no legal value. Kashmiris have an inalienable right to self determination in accordance with the relevant UN SC resolutions.

— Jalil Abbas Jilani (@JalilJilani) December 11, 2023

انہوں نے کہا کہ کشمیریوں کو اقوام متحدہ کی قراردادوں کے مطابق حق خودارادیت کا ناقابل تسیخ حق حاصل ہے، بھارت نے بین الاقوامی ذمہ داریاں پوری نہیں کیں، بھارتی سپریم کورٹ کا فیصلہ سلامتی کونسل قراردادوں کی بھی نفی کرتا ہے۔ بھارت کا جموں و کشمیر پر قبضے کا منصوبہ ناکام ہوگا، پاکستان مقبوضہ کشمیر پر بھارتی آئین کی بالادستی قبول نہیں کرتا، بھارتی اعلیٰ عدلیہ بدقسمتی سےاندھی ہوچکی ہے۔

نگراں وزیر خارجہ نے کہا کہ جموں و کشمیرعالمی طور پر تسلیم شدہ متنازع خطہ ہے، وہاں شخصی آزادی نہیں، مقبوضہ کمشیر میں انسانی حقوق کی خلاف ورزیاں کی جارہی ہیں، بابری مسجد کا واقعہ اور اس پر عدالتی فیصلہ بھی سامنے ہے، لہٰذا بھارتی آئین کے تابع کوئی بھی عمل قانونی اہمیت نہیں رکھتا۔ چین کو بھی کشمیر میں تقسیم سے متعلق خدشات ہیں، کشمیریوں کو احساس ہے پاکستان کشمیریوں کے موقف کے ساتھ ہیں۔

واضح رہے کہ بھارت کی سپریم کورٹ نے مقبوضہ جموں کشمیر کی آزاد حیثیت سے متعلق بھارتی آئین کے آرٹیکل 370کو صدارتی حکم کے ذریعے ختم کرنے کے فیصلے کو درست قرار دیا ہے۔

نگران وزیراعظم انوار الحق کاکڑ نے  وزارت داخلہ میں نئے ویزا نظام کا افتتاح کر دیا۔ وزارت داخلہ کے حکام نے وزیراعظم کو نئے ویزا نظام کے بارے میں آگاہ کیا۔

وزیراعظم کو بتایا گیا کہ نئے ویزا نظام کے تحت بزنس مینوں کو کم سے کم وقت میں ویزوں کا اجراء کیا جائے گا اور اس مقصد کے لئے کم سے کم دستاویزات درکار ہوں گی۔

ویزوں کے اجراء کے عمل کو آسان بنایا گیا ہے تاکہ ملک میں سرمایہ کاری اور کاروبار کو فروغ ملے۔

وزیراعظم نے وزارت داخلہ کی طرف سے نئے ویزا نظام کو خوش آئند قرار دیتے ہوئے کہا کہ اس سے کاروبار اور سرمایہ کاری کو فروغ ملے گا۔

وزیراعظم نے وزارت داخلہ میں میڈیا سنٹر کا بھی افتتاح کیا۔ وزیر داخلہ نے اس موقع پر بتایا کہ نادرا کے تعاون سے وزارت داخلہ میں میڈیا سنٹر کا قیام عمل میں لایا گیا ہے۔

پنجاب کی صوبائی کابینہ نے موٹر سائیکل رکشے کو تین پہیوں والے رکشے کی قانونی حیثیت دینے کیلئے موٹر وہیکلز رولز 1969 میں ترمیم کی منظوری دی ہے۔

 منظوری نگران وزیراعلیٰ پنجاب محسن نقوی  کے زیر صدارت آج کابینہ کے ایک اجلاس میں دی گئی۔

اجلاس میں پنجاب میڈیکل اینڈ ہیلتھ انسٹی ٹیوشن ایکٹ 2003 کے تحت ڈیرہ غازی خان کارڈیالوجی انسٹی ٹیوٹ کو جدید بنانے کی بھی منظوری دی گئی۔

اجلاس کے دوران فیصلہ کیا گیا کہ موٹر سائیکل رکشہ کو تھری ویلر کے طور پر رجسٹر کیا جائے گا۔

فیصلہ کیا گیا کہ موٹر سائیکل رکشہ کی عارضی رجسٹریشن کے لیے ریجنل ٹرانسپورٹ اتھارٹی کو اسپیشل رجسٹریشن اتھارٹی کا درجہ دیا جائے گا۔