این اے 75 ڈسکہ ضمنی الیکشن کی انکوائری رپورٹ کے مزید نکات سامنے آ گئے

تفصیلات کے مطابق  این اے 75 ڈسکہ ضمنی الیکشن کی انکوائری رپورٹ کے مزید نکات بھی سامنے آ گئے ہیں ،رپورٹ میں کہا گیا ہے کہ  پریذائڈنگ افسران کی گمشدگی اتفاق نہیں بلکہ منصوبہ بندی کے تحت ہوئی،  پریذائڈنگ افسران کو پہلے پسرور پھر سیالکوٹ لے جایا گیا ، انکوائری رپورٹ میں فردوس عاشق اعوان پر بھی انگلیاں اٹھ گئیں۔

انکوائری رپورٹ کے مطا بق  اے سی ڈسکہ کے گھر پر ضمنی انتخاب میں دھاندلی کیلئے میٹنگ ہوئی،  میٹنگ میں فردوس عاشق اعوان اور ڈپٹی ڈائریکٹر محکمہ تعلیم محمد اقبال اور دیگر موجود تھے،  وزیراعلی پنجاب کے ڈپٹی سیکرٹری علی عباس بھی میٹنگ میں موجود تھے،  پریذائڈنگ افسران کو شناختی کارڈ کی نقول پر بھی ووٹ ڈالنے کی اجازت دینے کا کہا گیا،  عملے کو کہا گیا پولیس اور انتظامیہ کے کام میں مداخلت نہیں کرنی،  انتخابی عملہ اور سرکاری مشینری قانون شکنوں کے کٹھ پتلی بنے رہے۔

انکوائری رپورٹ میں لاپتہ پریذائڈنگ افسران کا کردار بھی مشکوک قرار دیدیا ،  انکوائری میں الیکشن کمیشن کے اپنے افسران کو بھی ذمہ دار قرار دیا گیا ،  ڈی آر او اور ریٹرننگ افسر کو آئندہ انتخابی ڈیوٹی سے دور رکھنے کی سفارش  کی گئی ہے، ڈی آر او عابد حسین اور آر او اطہر عباسی الیکشن کمیشن کے اپنے افسران تھے ،  انکوائری کمیشن نے فارم 45 اور 46 میں ترمیم کی بھی سفارش کر دی ،  فارم 45 اور 46 میں پولنگ ایجنٹ کی ریسونگ کا خانہ شامل کرنے کی سفارش کی گئی ہے۔