پارلیمنٹ اجلاس : اسپیکر اسد قیصراور عبدالقادر مندوخیل کے درمیان تلخ کلامی

تفصیلات کے مطابق پارلیمنٹ  کے مشترکہ اجلاس میں اپوزیشن اور حکومت آمنے سامنے ہے ، اجلاس کے دوران پیپلزپارٹی کے رکن قومی اسمبلی عبدالقادر مندوخیل نےاسپیکر ڈائس پر نامناسب گفتگو کی ۔ اسپیکر اسد قیصر نے غصے میں کہا کہ آپ تمیز سے رہیں، میں باہر نکلوادوں گا۔

وزیرخارجہ شاہ محمود قریشی کے بعد پیپلزپارٹی کے چیئرمین بلاول بھٹو کو مائیک نہ دینے پرقادر مندوخیل اسپیکر ڈائس پر گئے  تھے  جس پر اسپیکر اسد قیصر نے کہا کہ میں بلاول کو موقع دے رہا تھا پھر یہ بدتمیزی کیوں۔ انہوں نے کہا بلاول صاحب آپ کو اس حرکت کا نوٹس لینا چاہیے۔

بعد ازاں اسپیکر اسد قیصر نے بلاول بھٹو کو بولنے کا موقع دیتے ہوئے  کہاکہ بلاول صاحب جس طرح آپکے رکن کا رویہ تھا ناقابل برداشت ہے ۔ چیئرمین پیپلزپارٹی نے الیکٹرانک ووٹنگ مشین کی مخالفت میں تقریر کی ۔ 

واضح رہے کہ پارلیمنٹ کا مشترکہ اجلاس جاری ہے ،  آج جس میں حکومت الیکٹرونک ووٹنگ مشین کے استعمال، اوورسیز پاکستانیوں کو ووٹ کے حق سمیت انتخابی اصلاحات کے علاوہ کئی اہم بل منظوری کے لیے پیش کرے گی۔ ان بلز کی منظوری کے لیے ایوان میں موجود ارکان کی سادہ اکثریت درکار ہے۔