مفتاح اسماعیل نے شرح سود میں اضافے کو ملکی صنعت کیلئے پھانسی کا پھندہ  قرار دیدیا

پاکستان مسلم لیگ (ن) کے رہنمااور سابق وزیر خزانہ مفتاح اسماعیل نے شرح سودمیںا ضافے کوملکی صنعت کے لیے پھانسی کاایک اور پھندہ قرار دے دیا  ہے۔

سابق وزیر خزانہ مفتاح اسماعیل کا کہنا ہے کہ  سود کے بڑھنے سے صرف صنعتی پیداوار میں کمی ہوگی اور حکومت کے اخراجات بڑھیں گے، ڈیڑھ فیصد سود بڑھانے سے مہنگائی کم نہیں وگی ، نجی شعبے کو مزید مشکلات اور سست روی کا سامنا کرنا پڑے گا ، سوا سات سے پونے 9 فیصد کرنے سے حکومت کی سود کی ادائیگی میں 400 ارب سالانہ کامزید اضافہ ہو گا۔

مفتاح اسماعیل نے کہا کہ  مہنگائی اور روپے کی قدرمیں کمی روکنے کے لئے دو سال پہلے بھی یہ کام حکومت نے کیاتھا،  اس اقدام سے پہلے بھی نہ مہنگائی رُکی نہ روپے کی قدر میں کمی بلکہ معیشت مزید کساد بازاری کی نذر ہوگئی تھی ،  عمران نیازی حکومت پہلے بھی شرح سود بڑھا کر ملکی معیشت کو ریورس گئیر لگا چکی ہے ،   ایک بار پھر تیزی سے شرح سود بڑھائی جارہی ہے، پہلے بھی معیشت سست روی کاشکار ہوئی تھی، پھر ہوگی ۔

ان کا کہنا تھا کہ شرح سودمیں اتنا تیزی سے اضافہ کرکے ملک میں آگ لگاتی ہوئی مہنگائی پر قابو کیسے پایا جا سکتا ہے ؟، اس اقدام سے مہنگائی پر قابو پایا جائے گا نہ ہی روپے کی گرتی ہوئی قیمت کو روکا جا سکے گا،  اکتوبر میں تاریخ کا سب سے بلند 15 ارب ڈالر سے زائد کرنٹ اکاﺅنٹ خسارہ ہونے جارہا ہے ، جب 75 ارب ڈالر کی امپورٹ دکھائی دے رہی ہوں تو روپے کی گرتی ہوئی قدر روکنا ممکن نظر نہیں آتا۔

مسلم لیگ ن کے رہنما کا کہنا تھا کہ  حکومت اپنے شاہی اخراجات کم کرے،  درآمدی اور دیگر شعبہ جات کو سستی گیس دی جائے ،  صنعت چلائیں تاکہ ملک سے زیادہ سے زیادہ برآمد اور کم سے کم درآمد ہو ،  مہنگائی کم کرنے کے لیے حکومت بجلی کے نرخوں میں کمی کرے ،  پٹرول کی قیمتوں کو کم کرنے عوام اورمعیشت کو ریلیف دیاجائے ، ریڈ ٹیپ میں کمی کرنا ہوگی۔