لاہور: شالیمار لنک روڈ پر  کٹی پتنگ کی ڈور گردن پر پھرنے سے نوجوان جان کی بازی ہار گیا

تفصیلات کے مطابق  لاہور کے علاقے شالیمار لنک روڈ پر  کٹی پتنگ کی ڈور گردن پر پھرنے سے نوجوان جان کی بازی ہار گیا۔  اسد نامی نوجوان موٹر سائیکل پر گھر جارہا تھا کہ کٹی پتنگ کی ڈور اسکی گردن پھر گئی، گردن کٹنے سے نوجوان موقع پر ہی دم توڑ گیا۔

 پتنگ بازی پر پابندی کے باوجود خطرناک کھیل کو روکنے میں پولیس ناکام نظر آتی ہے،  گذشتہ سالوں کے دوران قاتل ڈور پھرنے سے ننھے بچوں سمیت متعدد ہلاکتیں ہو چکی ہیں۔ ڈور پھرنے کے واقعات پر وزیراعلی اور سی سی پی او لاہور کی جانب سے نوٹسسز کے باوجود خونی کھیل جاری ہے۔

پولیس نے واقعہ کا مقدمہ تھانہ مغلپورہ میں درج کرلیا ہے،  مقدمہ نوجوان کے چچا کی مدعیت میں مغلپورہ پولیس اسٹیشن میں درج کیا گیا ہے۔