خدا حافظ! اب میری بس ہو چکی ہے، معروف کامیڈین بھارتی انتہا پسندوں کے نشانے پر آ گئے

ممبئی : بھارت میں معروف مسلمان کامیڈین منور فاروقی ایک بار پھر بھارتی انتہا پسندوں کے نشانے پر آ گئے۔

بھارتی اسٹینڈ اپ کامیڈین کا بنگلور میں ہونے والا شو پولیس نے منسوخ کردیا، جس پر مسکراہٹیں بکھیرنے ولے منور فاروقی دل برداشتہ ہوگئے۔ اور کہا کہ اب ان کی بس ہو گئی ہے۔

سوشل میڈیا اکاونٹ پر منور نے خدا حافظ کے ساتھ پیغام لکھا کہ نفرت جیت گئی، فنکار ہار گیا۔ پولیس نے یہ اقدام ہندو انتہا پسند تنظیموں کی جانب سے احتجاج کے بعد کیا۔

انھوں نے یہ بھی لکھا کہ مجھے اس مذاق کے لیے جیل میں ڈالنا جو میں نے کیا ہی نہیں تھا اور وہ شو منسوخ کرنا جس میں کوئی مسئلہ نہیں، نا انصافی ہے۔

اپنی ٹویٹ میں انھوں نے مزید لکھا ہے کہ ان کی نفرت کا بہانہ بن گیا ہوں، ہنسا کر کتنوں کا سہارا بن گیا ہوں، ٹوٹنے پر ان کی خواہش پوری ہو گی۔ صحیح کہتے ہیں میں ستارہ بن گیا ہوں۔

Nafrat jeet hai, Artist haar gaya.
Im done! Goodbye! INJUSTICE pic.twitter.com/la4xmaeQ0C

— munawar faruqui (@munawar0018) November 28, 2021

منور نے آخر میں لکھا ہے کہ میرا خیال ہے یہ اختتام ہے۔ میرا نام منور فاروقی ہے۔ وہ میرا وقت تھا اور آپ دیکھنے والے زبردست تھے۔ خدا حافظ! اب میری بس ہو چکی ہے۔

29 سالہ مسلمان کامیڈین کو پچھلے دو ماہ کے دوران انتہا پسندوں کی وجہ سے اپنے 12 شو منسوخ یا ملتوی کرنے پڑے ہیں۔ اس سے پہلے منور کو ہندر انتہا پسندوں کی وجہ سے گرفتار بھی کیا جاچکا ہے۔