چٹاگانگ ٹیسٹ:اوپنرز کی بہترین بیٹنگ سے پاکستان کی میچ پرگرفت مضبوط

تفصیلات کے مطابق پاکستان کی جانب سے عابد علی اور عبداللہ شفیق نے دوسری اننگز میں بھی اپنی ٹیم کو شاندار آغاز فراہم کیا اور دونوں بلے بازوں نے اپنی نصف سنچریاں مکمل کیں ہیں۔

چوتھے روز کا کھیل ختم ہوا تو عابد علی 56 اور عبداللہ شفیق 53 رنز کے ساتھ وکٹ پر موجود تھے جبکہ پاکستان کو جیت کے لیے مزید 93 رنز درکار ہیں۔

بنگلہ دیش کی ٹیم دوسری اننگز میں 157رنز ہی بنا سکی اور مجموعی طور پر بنگال ٹائیگر کو پاکستان پر 202 رنز کی برتری حاصل تھی۔

بنگلہ دیش کی جانب سے پہلی اننگز کے سنچری میکر لٹن داس نے دوسری اننگز میں بھی اچھی بیٹنگ کا مظاہرہ کرتے ہوئے 59 رنز اسکور کیے۔

پاکستان کی جانب سے شاہین شاہ آفریدی نے شاندار بولنگ کا مظاہرہ کرتے ہوئے 5 کھلاڑیوں کو آؤٹ کیا جبکہ 3 وکٹیں ساجد خان اور 2 وکٹیں حسن علی کے حصے میں آئیں۔