وزیراعظم کی زیرصدار ت وفاقی کابینہ کا اجلاس آج ہوگا

تفصیلات کے مطابق وزیراعظم کی زیر صدارت  اجلاس میں کابینہ  14 نکاتی ایجنڈے پر غور کرے گی ۔ اپوزیشن جماعتوں سے نمٹنے کی حکمت عملی پر تبادلہ خیال کیا جائے گا۔

اجلاس میں مختلف وزارتوں اور ڈویژنز میں سی ای اوز اور ایم ڈیز کی خالی آسامیوں بارے بریفنگ بھی  ایجنڈے میں شامل ہے ۔ 

اجلاس میں نیشنل ایوی ایشن پالیسی 2019 کے قانون میں ریلیکسیشن کی منظوری بھی شامل ہے ، قانون میں ترمیم کے لیے سیرین، ایر بلیو، پی آئی اے سی ایل اور پرنسلے جیٹس کمپنیوں نے نظرثانی کی درخواست کی تھی۔ 

کابینہ اجلاس میں سول ایوی ایشن کے رول 68 میں طیاروں کی پرواز کی اونچائی سے متعلق غور کیا جائے گا۔ تہران میں پاکستانی سفارتخانے کے افسران کے لیے گاڑیوں کی درآمد سکیم  کی منظوری  ، تبلیغی ویزوں پر ملک میں داخلے اور ویزوں میں توسیع کی منظوری بھی ایجنڈے میں شامل ہے ۔ 

کابینہ اجلاس میں فارما سوٹیکل کمپنیوں کے لیے ادویات کی تیاری اور پروموشن سے متعلق کابینہ کو بریفنگ دی جائے گی۔

اجلاس میں ای او بی آئی کے چیئرمین کی کنٹریکٹ پر تعیناتی کی منظوری دی جائے گی ۔ اوورسیز ایمپلائمنٹ پروموٹرز کے نئے لائسنس کے اجرا، پرانے لائسنس کے خاتمے اور منتقلی کی منظوری دی جائے گی۔

کابینہ کمیٹی برائے ادارہ جاتی اصلاحات کے فیصلوں کی توثیق کی جائے گی ،  کابینہ کو معاشی اعشاریوں سے متعلق تفصیلی بریفنگ دی جائے گی۔

اجلاس میں پنجاب ڈیری ڈویلپمنٹ ڈیپارٹمنٹ کو مویشیوں کے لیے فرانس سے مونٹانائیڈ آئل درآمد کی اجازت دی جائے گی۔ 

کابینہ پریس کونسل آف پاکستان اور ٓئی ٹی این ای کے چیئرمین کی تقرری کے لیے سلیکشن بورڈ کی منظوری دے گی ۔ وفاقی کابینہ تیونس (Tunisia ) کو کرونا سے نمٹنے کے لیے انسانی بنیادوں پر امداد کی فراہمی کی منظوری دے گی ۔

اجلاس میں کابینہ کمیٹی برائے توانائی کے فیصلوں کی توثیق بھی ایجنڈے میں شامل ہے ۔