امریکہ میں  اومی کرون ویرینٹ کا پہلا کیس رپورٹ 

عالمی خبر رساں ایجنسی کے مطابق امریکہ میں اومی کرون سے متاثرہ شخص نے جنوبی افریقہ کا سفر کیا تھا اور 22 نومبر کو امریکہ پہنچا تھا۔

وائٹ ہاؤس کے مطابق اومی کرون سے متاثرہ شخص ویکسین کا کورس مکمل کر چکا تھا، مریض کا علاج جاری ہے ۔ عالمی خبر رساں ایجنسی کے مطابق ڈاکٹر فاؤچی نے اس سلسلے میں بتایا ہے کہ اومی کرون سے متاثرہ شخص نے ویکسین لگوائی تھی لیکن اس نے بوسٹر ڈوز نہیں لگوائی تھی۔

دوسری جانب عالمی ادارہ صحت (ڈبلیو ایچ او) کے سربراہ ٹیڈروس ایڈہانوم نے کہا ہے کہ تمام ممالک پُرسکون رہ کر اومی کرون کے خلاف حقیقی اقدامات کریں۔انہوں نے کہا کہ نئے ویرینٹ اومی کرون سے متعلق ابھی بہت سے سوالات جواب طلب ہیں، تمام ممالک منطقی، متناسب اور خطرے میں کمی لانے والے اقدامات کریں ۔ 

واضح رہے کہ امریکہ میں جوبائیڈن انتظامیہ نے اومی کرون کا انکشاف ہوتے ہی جنوبی افریقہ سمیت دیگر ممالک پر سفری پابندیاں عائد کردی تھیں۔