سپریم کورٹ نے میڈیکل کالجز میں داخلوں کیلئے ایم ڈی کیٹ لازم قرار دیدیا

تفصیلات کے مطابق  سپریم کورٹ نے میڈیکل کالجز میں داخلوں کیلئے ایم ڈی کیٹ لازم قرار دیدیا  ہے، سپریم کورٹ نے ایم ڈی کیٹ کیخلاف دائر اپیلیں خارج کر دیں اور  لاہور ہائیکورٹ کا فیصلہ برقرار رکھا۔ عدالت نے میڈیکل طلبہ کی درخواستوں پر تحریری فیصلہ جاری کر دیا۔ پانچ صفحات پر مشتمل فیصلہ جسٹس منصور علی شاہ نے جاری کیا۔

عدالت کا کہنا ہے کہ ایم ڈی کیٹ ٹیسٹ کو قانونی تحفظ حاصل ہے، نجی میڈیکل کالجز کے داخلے کیلئے بنائے گئے طریقہ کار کا ایم ڈی کیٹ سے تعلق نہیں ہے، ایم ڈی کیٹ قانونی تقاضا ہے، باقی تمام ٹیسٹ نجی کالجز کے اپنے ہیں، کوئی نجی میڈیکل کالج ایم ڈی کیٹ سے راہ فرار اختیار نہیں کر سکتا۔

رواں سال اکتوبر میں لاہور ہائیکورٹ نے میڈیکل کالجز میں داخلوں کیلئے لئے گئے ایم ڈی کیٹ کو قانون کے مطابق درست قرار دے دیا تھا اور ایم ڈی کیٹ کا دوبارہ انٹری ٹیسٹ لینے کے لئے دائر تمام درخواستیں خارج کردیں تھیں۔

لاہور ہائی کورٹ نے فیصلے میں کہا تھا کہ  پی ایم سی ایکٹ 2020 کے سیکشن اٹھارہ  کے تحت ایگزیمینین 2021 کا اقدام درست ہے۔ ایم ڈی کیٹ کے انٹری ٹیسٹ کے لئے اخبار میں اشتہار دیا گیا۔ اس وقت کسی طالب علم نے اسے چیلنج نہیں کیا۔ طلباء نے ایم ڈی کیٹ انٹری ٹیسٹ میں حصہ لیا، صرف فیل ہونے کے بعد ایم ڈی کیٹ انٹری ٹیسٹ کو چیلنج کیا۔