دنیا کے دس مہنگے ترین شہر کون سے ہیں؟ نئی رینکنگ جاری

غیر ملکی خبر رساں ادارے کے مطابق عالمی سطح پر رہن سہن پر آنے والی لاگت کا جائزہ لینے والے ادارے دی اکنامسٹ انٹیلی جنس یونٹ (ای آئی یو) نے دنیا کے مہنگے ترین شہروں کی فہرست جاری کردی ہے۔

سروے کے مطابق اسرائیل کے شہر تل ابیب کو رہنے کے لحاظ سے دنیا کا سب سے مہنگا ترین شہر قرار دیا گیا ہے، اسرائیلی شہر گزشتہ سال کے سروے میں پانچویں نمبر پر موجود تھا۔

 پیرس اور سنگاپور دونوں مہنگے ترین شہروں میں  دوسرے نمبر پر موجود ہیں۔ پچھلے سال، پیرس، زیورخ اور ہانگ کانگ نے سروے میں مشترکہ طور پر پہلی پوزیشن حاصل کی تھی ۔لیکن اس بار ای ائی یو کی فہرست میں زیورخ چوتھے اور ہانگ کانگ پانچویں نمبر پر ہیں۔

دی اکنامسٹ انٹیلی جنس یونٹ کی جانب سے جاری کردہ فہرست کے مطابق   نیویارک چھٹے ،جنیوا ساتویں ،کوپن ہیگن آٹھویں، لاس اینجلس نویں اور اوساکا دسویں نمبر پرہیں۔

رپورٹ کے مطابق ای آئی یو نے فہرست کو بناتے  وقت 173 شہروں میں مصنوعات و خدمات پر آنے والے اخراجات کا جائزہ لے کر ان کی قیمتوں کا موازنہ امریکی ڈالر میں کیا گیا ہے۔رپورٹ میں کہا گیا ہے کہ رواں سال اگست اور ستمبر میں جو ڈیٹا اکٹھا کیا گیا ہے اس سے ظاہر ہوتا ہے کہ مقامی کرنسی کے لحاظ سے قیمتوں میں اوسطاً 3.5 فیصد اضافہ ہوا جو گزشتہ پانچ سالوں میں مہنگائی کی تیز ترین شرح  ہے۔

ای آئی یو سروے رپورٹ میں کہا گیا ہے کہ اسرائیلی شہر تل ابیب ٹرانسپورٹ کے لحاظ سے دنیا کا دوسرا اور سیرو تفریح  کے لحاظ سے دنیا کا چھٹا مہنگا ترین شہر ہے۔

سروے رپورٹ کے مطابق شام کا شہر دمشق اس سال بھی رہائش کے لیے دنیا کا سب سے سستا ملک ہے۔