پاکستان کے مایہ ناز سینئر اداکار رشید ناز انتقال کر گئے

پاکستان کے معروف سینئر اداکار رشید ناز 9 ستمبر  1948 کو خیبرپختون خوا میں پیدا ہوئے ، انہوں  نے بےشمار فلموں اور ڈراموں میں اداکاری کے جوہر دکھائے۔ 1971 میں انہوں نے پشتو ڈرامے میں بطور اداکار اپنے ٹیلی ویژن کیریئر کا آغاز کیا۔

 رشید ناز نے کئی پشتو، ہندکو اور اردو زبان کے ڈراموں میں کام کیا۔ ان کا پہلا اردو ڈرامہ ’ایک تھا گاؤں‘ تھا جو 1973 میں نشر کیا گیا۔ ان کا پہلا مقبول ڈرامہ ’ناموس‘ تھا۔ انہوں نے پاکستان کے پہلے نجی ٹیلی ویژن کے ڈرامے ’دشت‘ میں بھی کام کیا۔

1988 میں انہوں نے اپنی پہلی پشتو فلم ’زما جنگ ‘میں اداکاری کے جوہر دکھائے۔ ان کی پہلی اردو فلم سید نور کی ’ڈکیت‘ تھی ، انہوں نے شعیب منصور کی فلم ’خدا کے لیے‘ میں بھی کام کیا۔

رشید ناز نے شعیب منصور کے ایک معروف ویڈیو گانے ’عشق محبت اپنا پن‘ میں ایمان علی کے ساتھ بھی کام کیا ، ان کی مشہور فلموں میں کراچی سے لاہور، ورنہ، خدا کے لیے اور دیگر شامل ہیں۔

انہوں نے خدا زمین سے گیا نہیں ہے ، انکار ، انوکھی، اپنے ہوئے پرائے، غلام گردش، دوسرا آسمان، ناموس، پتھر ، آن سمیت دیگر ڈراموں میں اپنی جاندار اداکاری سے مداحوں کے دل جیت لیے ۔

اداکار رشید ناز کی بہو اور اداکارہ مدیحہ رضوی  نے اپنے انسٹاگرام پر ایک پوسٹ شیئر کی جس میں انہوں نے یہ خبر دی کہ اداکار رشید ناز اب ہم میں نہیں رہے۔  اپنی پوسٹ میں اداکارہ نے لکھا کہ  " ہمارے پیارے بابا رشید ناز آج صبح اس دنیا سے رخصت ہو گئے، مرحوم کی روح کے ایصال ثواب کے لیے سورہ فاتحہ ضرور پڑھیں ۔"

خاندانی ذرائع کے مطابق ان کی نمازجنازہ آج دوپہر 3بجے ادا کی جائے گی ۔

 

 

 

 

 

View this post on Instagram

 

 

 

 

 

 

 

 

 

 

 

A post shared by Madiha Rizvi Official (@diyariz)