قذافی اسٹیڈیم میں 92 ورلڈ کپ کی ٹرافی سجا دی گئی

تفصیلات کے  مطابق لاہور ٹیسٹ کے آخری  دن قومی کرکٹرز نے ورلڈ کپ ٹرافی کے ساتھ تصاویر بھی  بنوائیں۔  مینجمنٹ کے اراکین نے بھی پویلین کے سامنے رکھی ٹرافی کے ساتھ تصاویر بنوائیں۔

There’s a celebrity on ground today! #BoysReadyHain l #PAKvAUS pic.twitter.com/OWmqmg9T0y

— Pakistan Cricket (@TheRealPCB) March 25, 2022

یاد رہے کہ پاکستان کرکٹ بورڈ نے ورلڈکپ1992کی تاریخی جیت کی سالگرہ منانے کا فیصلہ کیا تھا۔

پی سی بی کے مطابق 25مارچ کی مناسبت سے ورلڈکپ ٹرافی جمعے کو قذافی اسٹیڈیم میں رکھی جائے گی ، شائقین ٹرافی کے ساتھ سیلفیز اور تصاویر بنوا سکیں گے ، ٹرافی پاکستان اور آسٹریلیا کے ڈریسنگ روم میں بھی جائے گی۔

پی سی بی کا کہنا تھا کہ ورلڈکپ 1992کے فائنل کی تصویری جھلکیوں پر مشتمل سلائیڈ شو بھی جاری کیا جائے گا۔

 واضح رہے کہ وزیراعظم پاکستان عمران خان 1992ورلڈ کپ کی فاتح ٹیم کے کپتان تھے، جبکہ موجودہ چیئرمین پی سی بی رمیز راجا بھی اس ٹیم کا حصہ تھے۔

25مارچ تمام پاکستانیوں اور خاص طور پر کرکٹ اورشائقین کرکٹ کیلئے  ایک یادگار دن  تصور کیا  جاتا ہے کیونکہ 1992 میں اس دن پاکستان نے انگلینڈ کے خلاف میچ میں شاندار کارکردگی کا مظاہرہ کیا اور کرکٹ کا عالمی چیمپئن بنا۔