اسلام آباد میں لوگوں کو خریدنے کیلئے منڈی لگی ہوئی ہے: وزیراعظم

تفصیلات کے مطابق خیبرپختونخوا کے ضلع مانسہرہ میں پی ٹی آئی جلسے سے خطاب کرتے ہوئے وزیراعظم کا کہنا تھا کہ  تین چوہے مل کر میرا شکار کرنا چاہتے ہیں، ہم انہیں شکست دیں گے، یہ چاہتے ہیں کہ کسی طرح عمران خان ان کو این آر او دے،میں جنرل (ر) مشرف کی طرح ان کو این آر نہیں دوں گا، اگر میں نے انہیں این آر او دے دیا تو یہ میری پاکستان سے سب سے بڑی غداری ہو گی۔

ان کا کہنا تھا کہ  ایک بھگوڑا بیماری کا بہانہ کر کے ملک چھوڑ کر فرار ہو گیا، ان پر کرپشن کیسز معاف کیے تو ملک سے غداری کروں گا، یہ چوہے اس لیے اکٹھے ہوئے ہیں ملک کے حالات خراب ہیں، ٹیکس میں تاریخی اضافہ ہوا، گندم، گنے، چاول، آلو اور مکئی کی پیدوار میں ریکارڈ اضافہ ہوا۔ 

انہوں نے کہا ہےکہ جس معاشرے میں انصاف نہ ہو و ہ ترقی نہیں کرسکتا، جس معاشرے میں قانون کی حکمرانی نہیں ہوتی وہ معاشرہ ترقی نہیں کرتا۔

عمران خان کا کہنا تھا کہ زندگی اور موت اللہ کے ہاتھ میں ہے، اقوام متحدہ میں اسلاموفوبیا کیخلاف قرار داد پاس کرائی، اب ہر سال 15مارچ اسلامو فوبیا کیخلاف دن منایا جائے گا، آزادی رائے کے نام پر مسلمانوں کو تکلیف دی جاتی تھی۔

ان کا کہنا تھا کہ  فضل الرحمان 30 سال سےسیاست میں ہے اس نے اسلاموفوبیا کے لیے کیوں نہیں کچھ کیا، پی ڈی ایم سربراہ 30 سال سے دین کے نام پر سیاست کر رہا ہے۔

انہوں نے کہا ہے کہ ماضی میں ایسے لیڈر آئے جنہوں نے ملک کا پیسہ چور ی کر کے باہر بھیجا، ماضی کے حکمرانوں نے ملک کو دوسروں کا غلام بنا دیا،ہم امریکا کیلئے ہی جنگ لڑ رہے تھے اور وہ ہم پر ڈرون حملے کررہا تھا، یہ اپنی دولت کے غلام ہیں انہوں نے کبھی ڈرون حملوں کی مذمت نہیں کی۔

ان کا مزید کہنا تھا کہ ہماری کسی سے کوئی دشمنی نہیں ہے، لیکن ملک کو کسی کے سامنے جھکنے نہیں دیں گے،اللہ نے یہ اجازت نہیں دی اچھے اور بُرے کی جنگ ہو تو آپ کہیں میں نیوٹرل ہوں۔