معین اختر کو مداحوں سے بچھڑے 11 برس بیت گئے

ہردل  عزیز اوربے مثال فنکار معین اختر 24 دسمبر 1950کو کراچی میں پیدا ہوئے اور صرف 13 برس کی عمر میں ہی سٹیج پرادکاری کے جوہر دکھانا شروع کیے ۔ 16 سال کی عمر میں امریکی صدر جان ایف کینیڈی کی نقل اتار کر ٹیلی ویژن پر اداکاری کا آغاز کیا ۔انہوں نے ریڈیو ، ٹی وی ، اسٹیج اور فلم میں اپنی صلاحیتوں کے جوہر دکھائے ۔

اداکاری کے علاوہ  پوری دنیا میں  ان کی میزبانی کے انداز کو سراہا جاتا ہے  ۔ کامیڈی کی دنیا میں معین اختر کا کوئی ثانی نہیں تھا جب وہ کامیڈی کرتے تو مرجھائے ہوئے چہرے کھل اٹھتے تھے اور ان کی کامیڈی  لبوں پر مسکراہٹیں بکھیر دیتی تھی۔

 معین اختر کا خاندان قیام پاکستان کے بعد ہجرت کرکے کراچی میں قیام پذیر ہوا۔انہوں نے اپنی تمام تر تعلیم کراچی میں ہی حاصل کی اور دوران تعلیم معین اختر غیر نصابی سرگرمیوں میں بھی بڑھ چڑھ کر حصہ لیتے تھے۔

معین اختر نے اسکرین پر سنجیدہ اداکاری  کرکے کئی بار ناظرین کو اشکبار بھی کیا ۔ انہوں نے مشہور زمانہ "روزی" کے کردار میں خود کو ایسا ڈالا کہ سب ہی لوگ انہیں " روزی "سمجھتے تھے ۔ لیجنڈری اداکار معین اختر کے یاد گار ڈراموں اور اسٹیج شوزمیں آنگن ٹیڑھا،روزی، سچ مچ، نوکر کے آگے چاکراور اسٹوڈیو پونے تین ،  بندر روڈ سے کیماڑی، آنگن ٹیڑھا، اسٹوڈیو ڈھائی ، یس سر نو سر اورعید ٹرین شامل ہیں، ڈرامہ روزی میں ان کاکردارشاید کبھی نہ بھلایا جاسکے۔

حکومت پاکستان نے معین اختر کی خدمات کا اعتراف کرتے ہوئے انہیں "تمغہ برائے حسن کارکردگی اور ستارہ امتیاز سے بھی نوازا۔

معین اختر 22 اپریل 2011 کو حرکت قلب بند ہونے سے کراچی میں  انتقال کرگئے تھے۔  پاکستان کی ثقافت کو ڈراموں اور شوز کے ذریعے جس طرح سے معین اختر نے متعارف کروایا، کوئی دوسرا شاید ہی یہ کام اس خوبی سے کرسکے۔