سابق پاکستانی کرکٹر راشد لطیف کا سیاست میں آنے کا اعلان

نجی ٹی وی سے گفتگو میں پاکستان کرکٹ ٹیم کے سابق کپتان  و وکٹ کیپر راشد لطیف نے عملی طور پر سیاست میں آنےکا اعلان کردیا۔

اپنی گفتگو میں رازد لطیف کا کہنا تھا کہ ملکی حالات کو بغور دیکھ رہا ہوں اور ابھی کام کرنے کی سکت رکھتا ہوں، ممکن ہے آئندہ 2 سے 3 سال میں آپ مجھے سیاست میں دیکھیں۔

اپنی سیاسی جماعت بنانے سے متعلق سوال پر انہوں نے کہا کہ میں اپنی سیاسی جماعت بنانے کا کوئی ارادہ نہیں رکھتا البتہ میرے سیاسی نظریات اور وابستگی سے سب واقف ہیں،میں پرانی جگہ اور لوگ چھوڑنے والا نہیں بلکہ منشور کے ساتھ چلنے والوں میں سے ہوں۔

واضح رہے کہ راشد لطیف نے 1992ء سے 2005ء تک 37 ٹیسٹ اور 166 ون ڈے انٹرنیشنل میں قومی ٹیم کی نمائندگی کی، انہوں نے حال ہی میں کشمیر پریمئیر لیگ کے ساتھ بطور ڈائریکٹر کرکٹ وابستگی اختیار کی تھی۔