لاہور : تیز رفتار گاڑی کے نیچے آ کر دو بچیاں جاں بحق

تفصیلات  کے مطابق حادثہ تیز رفتاری کے باعث پیش آیا،حادثے میں 9 سالہ آمنہ، 7 سالہ سمیعہ اور 4 سالہ فاطمہ اور 7 سالہ نامعلوم بچہ زخمی ہوئے  ہیں۔

 حادثے کے فوری بعد زخمیوں کو اسپتال منتقل کیا گیا لیکن 4 سالہ فاطمہ اور نامعلوم 7 سالہ بچی زخموں کی تاب نہ لاتے ہوئے دم توڑ گئے۔

واقعے کی سی سی ٹی وی  فوٹیج   بھی منظرعام پر آگئی ، فوٹیج میں تیز رفتار گاڑی کو بچوں کو کچلتے دیکھا جاسکتا ہے ، پولیس نے کار ڈرائیور کو حراست میں لے  کر تحقیقات شروع کر دی  ہیں۔

وزیر اعلی پنجاب حمزہ شہباز  نے  کوٹ لکھپت میں ٹریفک حادثہ میں 2 بچیوں کے جاں بحق ہونے کے واقعہ پر دکھ اور افسوس کا اظہارکیا ہے ۔ 

 وزیر اعلی حمزہ شہباز نے جاں بحق بچیوں کے لواحقین سے دلی ہمدردی و اظہار تعزیت کرتے ہوئے کہا کہ  ڈرائیور کی غفلت سے معصوم بچوں کا دنیا سے چلے جانا انتہائی دلخراش واقعہ ہے، زخمی بچوں کو علاج معالجے کی بہترین سہولتیں فراہم کی جائیں ۔ 

 وزیر اعلی ٰ نے حادثے کے ذمہ دار ڈرائیور کے خلاف بلاامتیاز قانونی کارروائی کا حکم دیتے ہوئے  سی سی پی او لاہور سے رپورٹ طلب کر لی۔