وزیر اعظم کا سائنو ویک کی سرمایہ کاری پیشکش کا خیر مقدم

 تفصیلات کے مطابق وزیراعظم شہبازشریف  چین کی کمپنی سائنوویک  کے ایک وفد سے باتیں کررہے تھے جس نے آج اسلام آباد میں کمپنی کے جنرل منیجر(Qiang Gao) شیانگ کاؤ  کی سربراہی میں ان سے ملاقات کی ۔ اس موقع پر وفاقی وزیرِ صحت عبدالقادر پٹیل اور دیگر متعلقہ اعلیٰ حکام بھی موجود تھے۔

 چین اور پاکستان کے درمیان مثالی دوستی کو اجاگر کرتے ہوئے وزیراعظم نے کہا کہ حکومت سائنو ویک کی جانب سے کی گئی سرمایہ کاری کی پیشکش کا خیرمقدم کرتی ہے اور اس حوالے سے تمام ممکنہ تعاون فراہم کرے گی۔

چینی گروپ نے پاکستان میں امراض کی تشخیص ،بچائو اور علاج کیلئے سرمایہ کاری کے ذریعے مشترکہ پروگرام شروع کرنے میں گہری دلچسپی ظاہر کی۔

 وزیراعظم کو کورونا وائرس سے بچائو کی ویکسین لگانے کی مہم کے دوران پاکستان کو سائنو ویک کی طرف سے فراہم کی گئی ویکسین سے متعلق بھی آگاہ کیاگیا۔

 اس موقع پر شہبا ز شریف نے کہا کہ پاکستان کورونا وائرس کے دوران چین کے تعاون کی انتہائی قدر کرتا ہے،  ملک میں براہ راست غیرملکی سرمایہ کاری میں اضافہ حکومت کی اولین ترجیح میں شامل ہے ۔

وزیراعظم نے وزیر صحت کو ہدایت کی کہ اس حوالے سے فوری طور پر ایک ٹاسک فورس تشکیل دی جائے تاکہ سائنو ویک اس منصوبے پر جلد کام شروع کرسکے۔