جو قومیں اپنے شہداکو بھول جاتی ہیں، وہ مٹ جاتی ہیں:آرمی چیف

پاک فوج کے شعبہ تعلقات عامہ کے مطابق جنرل ہیڈکوارٹر ہیڈکوارٹرز میں شہدا کی فیملیز اور غازیوں میں اعزازات تقسیم کرنے کے لیے تقریب کا اہتمام کیا گیا۔

تقریب سے خطاب میں آرمی چیف جنرل قمر جاوید باجوہ نے شہیدوں اور ان کی فیملیز کو خراج عقیدت پیش کرتے ہوئے کہا کہ مادر وطن پر قربان ہونے والے بہادر شہدوں کو سلام پیش کرتا ہوں، آج پھر مادر وطن پر قربان بہادر جوانوں کے لیے اکٹھے ہوئے ہیں۔

آرمی چیف نے کہا کہ یہ پاکستان جو آج محفوظ ہے، جہاں ہم رات کو آرام سے سوتے ہیں، یہ انہی آفیسرز، جے سی اوز اور جوانوں کے خون کی قُربانی کے ذریعے ممکن ہوا ہے، رہتی دنیا تک شہدا کا نام چمکتا رہے گا، شہید نے دنیا میں بھی اور آخرت میں بھی اپنانام کمالیا، شہید کے خون کا قطرہ گرنے سے پہلے ہی اس کی بخشش ہوجاتی ہے، شہید اپنے ورثا کے لیے بھی جنت کے راستے کھول دیتا ہے۔

جنرل قمر جاوید باجوہ نے کہا کہ شہدا کے ورثا کو یقین دلاتا ہوں ان شااللہ آپ کو کبھی مایوس نہیں کریں گے، دنیا کہتی ہے یہ واحد فوج ہے جس نے دہشت گردی کا خاتمہ کیا ہے، دنیا پوچھتی ہے دہشت گردی کو کیسے ختم کیا جبکہ باقی ملک فیل ہوگئے، ہمارے اصل ہیروز شہدا اور غازی ہیں، جو قومیں اپنے شہدا کو بھول جاتی ہیں وہ مٹ جاتی ہیں۔