ہماری پارٹی باقیوں سے اسی لیے بہتر ہے کہ یہ خاندانی نہیں جمہوری پارٹی ہے: عمران خان

اسلام آباد میں پاکستان تحریک انصاف کے نیشنل کونسل اجلاس سے خطاب میں سابق وزیر اعظم عمران خان نے کہا کہ تحریک انصاف کو ایک پارٹی سے ادارہ بنانا ہے، ملک سے موروثی سیاست اور خاندانی بادشاہت کو خاتمہ کر کے عام لوگوں کو اوپر لاناہے، ہماری پارٹی باقی سیاسی پارٹیوں سے اسی لیے بہتر ہے کہ یہ ایک خاندانی نہیں جمہوری پارٹی ہے۔

انہوں نے کہا کہ حقیقی آزادی مارچ کے دوران جس طرح خواتین نے جس طرح جبر کا سامنا کیا اور عزم و بہادری سے کھڑی رہیں ان تمام خواتین کو خراج تحسین پیش کرتا ہوں،امپورٹڈ حکومت کا اقتدار میں رہنےکہ صرف ایک مقصد ہے اور وہ ہے پاکستان کے تمام ادارے برباد کر کے انہیں ذاتی نوکروں کےحوالے کرنا، انہوں نے الیکشن کمیشن کو متنازعہ کردیا، نیب میں یہ اپنا بندہ لگا رہے ہیں،ایف آئی اے کو یہ برباد کررہے ہیں،کچھ بھی کرلیں یہ قوم سب دیکھ رہی ہے۔

سابق وزیر اعظم نے کہا کہ سب تیاری کریں جیسے ہی سپریم کورٹ سے فیصلہ آیا میں احتجاج کی تاریخ کا اعلان کروں گا،ہم سب نے اس امپورٹڈ حکومت اور اس غلامی کو کسی صورت قبول نہیں کرنا۔

واضح رہے کہ انٹرا پارٹی الیکشن میں سابق وزیراعظم عمران خان اگلی ٹرم کے لیے پاکستان تحریک انصاف کے بلا مقابلہ چیئرمین منتخب ہو گئے ہیں۔