جاپان میں منکی پاکس کا پہلا کیس سامنے آگیا

بین الاقوامی خبر رساں ادارے  کے مطابق منکی پاکس سے متاثرہ زیرعلاج 23 سالہ  شخص یورپ سے واپس آیا ہے ۔

وزارت صحت کی میڈیا بریفنگ میں بتایا گیا ہے کہ شہری کو بخار، سر درد اور تھکاوٹ کی شکایت تھی، لیکن اس کی حالت بہتر ہے اور کوئی خطرہ نہیں تاہم اسے قرنطینہ کر دیا گیا ہے۔

رپورٹس کے مطابق ٹوکیو کا رہائشی مریض، گزشتہ ماہ کے آخر میں یورپ گیا تھا اور اس کا رابطہ ایک ایسے شخص سے ہوا تھا جس کا منکی پاکس مثبت آیا تھا۔

عالمی ادارہ صحت  نے منکی پاکس کی تیزی سے پھیلتی وباء کو عالمی صحت میں ہنگامی صورتحال قرار دیا تھا۔

خیال رہے کہ اب تک دنیا بھر کے 75 سے زائد ممالک میں 16 ہزار 6 سو سے زیادہ منکی پاکس کیسز اور افریقی ممالک میں 5 اموات رپورٹ ہوئی ہیں۔

واضح رہے کہ منکی پاکس چیچک کی طرح ایک بیماری ہے لیکن اس کی شدت چیچک سے کم ہے ۔ منکی پاکس کے متاثرہ مریض کے جسم پر چھوٹے چھوٹے دانے نکل آتے ہیں، اس کے علامات میں بخار، سردرد اور جسم میں تھکاوٹ ہونا شامل ہیں ۔

منکی پاکس جنگلی جانوروں خصوصا زمین کھودنے والے چوہوں اور لنگوروں میں پایا جاتا ہے اور اکثر ان سے انسانوں کو بھی منتقل ہو جاتا ہے۔