جاپان میں مسلسل تیسرے ہفتے کورونا کیسز کی تعداد دنیا میں سب سے زیادہ ہے : عالمی ادارہ صحت

جاپانی خبررساں ادارے نے عالمی ادارہ صحت  کے جاری کردہ ہفتہ واراعدوشمار کے حوالے سے بتایا کہ یکم سے سات اگست تک ایک ہفتے کے دوران عالمی سطح پر کورونا وائرس کے 69 لاکھ80 ہزار516 کیس رپورٹ ہوئے جبکہ جاپان میں یہ تعداد 14 لاکھ 96 ہزار 968ریکارڈ کی گئی ہے ۔

عالمی ادارہ صحت نے کہا کہ جاپان میں کورونا وائرس کی یہ تعداد مسلسل تیسرے ہفتے دنیا میں کسی بھی ملک سے سب سے زیادہ ہے جبکہ ملک میں اس عرصے کے دوران 1002 اموات ہوئیں جو گزشتہ ہفتے کے مقابلے میں 53 فیصد زیادہ ہے ۔

جاپان میں اموات کی یہ تعداد امریکا، برازیل اور اٹلی کے بعد چوتھے نمبر پر ہے۔

عالمی ادارہ صحت کا کہنا ہے کہ دنیا میں کووڈ۔19 کیسز اور اموات کی اصل تعداد زیادہ ہوسکتی ہے کیونکہ کئی ممالک نے ٹیسٹ کی حکمت عملی تبدیل کر دی ہے اور نتیجتاً مجموعی طور پر کم ٹیسٹ کئے جارہے ہیں۔

بتایا گیا ہے کہ جاپان میں انفیکشن کی تعداد میں حالیہ اضافے کی وجہ اومیکرون کا نیا ویرینٹ بی اے ۔5 ہے۔