آئی ایم ایف ایگزیکٹو بورڈ کا اجلاس آج ہو گا،پاکستان کیلئے قرض کی منظوری کا امکان

 آئی ایم ایف کے ایگزیکٹو بورڈ کا اجلاس آج امریکہ میں ہوگا جس میں پاکستان کے ساتھ معاہدے کی منظوری دئیے جانے کا امکان ہے۔ ہم نیوز کی رپورٹ کے مطابق ساتویں اور آٹھویں جائزے کے بعد اسٹاف لیول معاہدے کی منظوری کی صورت میں پاکستان کو فوری طور پر ایک ارب17 کروڑ ڈالر کا قرض جاری ہونے سے رکا ہوا پروگرام بحال ہوجائے گا۔ 

پاکستان نے پروگرام کی مدت میں ایک سال کی توسیع اور قرض کی رقم میں ایک ارب ڈالر اضافے کی درخواست کر رکھی ہے،آج ہونے والے بورڈ کے اجلاس میں سعودی عرب کے قرض کا کوٹہ بھی پاکستان کو دئیے جانے کا امکان ہے۔ یاد رہے کہ گزشتہ دنوں عالمی مالیاتی ادارے نے پاکستان کو لیٹر آف انٹینٹ جاری کیا تھا اور پاکستان کی جانب سے پروگرام بحالی کی مسلسل کوششیں جاری رہیں۔ 

قبل ازیں قائم مقام گورنر اسٹیٹ بینک مرتضٰی سید کا کہنا تھا کہ آئی ایم ایف بورڈ کی منظوری کے 6 دنوں میں پاکستان کو ایک ارب 17 کروڑ ڈالر مل جائیں گے۔آئی ایم ایف بورڈ سے اجلاس ہے جس کی منظوری کے بعد 4 ارب ڈالر دوطرفہ ترسیلات حصول کا راستہ ہموار کرے گا۔ قائم مقام گورنر اسٹیٹ بینک کا غیر ملکی جریدے بلوم برگ کو انٹرویو میں کہنا تھا کہ پاکستان کو مالی سال 2023 میں 31 ارب ڈالر کی ضرورت رہے گی جس کیلئے پاکستان کو 38 ارب ڈالرفراہمی کی یقین دہانیاں کرائی گئی۔ 

انہوں نے کہا کہ پاکستان نے ضرورت سے زائد فنڈنگ کا انتظام کرلیا ہے،مالی سال کے اختتام تک پاکستان کے زرمبادلہ کے ذخائر 16 ارب ڈالر ہو جائیں گے۔اس برس فروری سے اب تک ملکی زرمبادلہ کے ذخائر 8 ارب ڈالر کم ہوئے ہیں۔ زرمبادلہ کے ذخائر آئی ایم ایف معاہدے میں تاخیر اور ادائیگیوں کی وجہ سے کم ہوئے۔مرتضیٰ سید کا کہنا تھا کہ مالی سال کے اختتام تک ملکی زرمبادلہ کے ذخائر 16 ارب ڈالر ہوجائیں گے۔