سیلاب  کی تباہ کاریاں ، ملک بھر میں  مزید36 افراد جاں بحق 

ملک بھر میں سیلاب اور بارشوں نے تباہی مچادی ہے ، این ڈی ایم اے کےمطابق  گزشتہ چوبیس گھنٹے میں مزید 36  اموات  کے بعد  جاں بحق افراد کی مجموعی تعداد ایک ہزار 162 ہوگئی۔سندھ میں سب سے زیادہ 405 اموات ، خیبرپختونخوا میں 257، بلوچستان میں 249اور پنجاب میں 187افراد جان کی بازی ہار گئے ۔

این ڈی ایم اے کے مطابق مجموعی طور پر تین کروڑ 30 لاکھ سے زیادہ آبادی اس قدرتی آفت سے متاثر ہونے کا تخمینہ ہے۔

مون سون کے آغاز سے اب تک 1 ہزار 74 افراد مختلف حادثات میں زخمی ہوئے ہیں جبکہ زخمیوں میں 617 مرد ، 257 عورتیں اور 200 بچے شامل ہیں۔

ملک بھر میں تین لاکھ 24 ہزار سے زائد گھر  مکمل تباہ ہوئے، 243 پلوں  کو نقصان پہنچا جبکہ پانچ ہزار تریسٹھ کلومیٹر سڑکیں بہہ گئیں۔

ملک بھر میں 7 لاکھ 35 ہزار مویشی بھی مارے گئے ہیں، سندھ، بلوچستان، خیبر پختونخوا اور جنوبی پنجاب میں ہرطرف پانی نے گھر گھر تباہی مچا دی ہے۔

دوسری جانب اقوام متحدہ نے پاکستان میں سیلاب سے ہونے والے نقصانات کے تناظر میں 16 کروڑ ڈالر امداد کی ہنگامی اپیل جاری کی ہے۔