ٹی20 ورلڈ کپ کا فائنل بارش سے متاثر ہونے کا خدشہ

تفصیلات کے مطابق پاکستان ٹیم فائنل کیلئے کوالیفائی کرچکی ہے جبکہ دوسری ٹیم کا فیصلہ آج ایڈیلیڈ میں بھارت اور انگلینڈ کے درمیان سیمی فائنل کے بعد ہوگا۔

اس سلسلے میں قومی ٹیم میلبورن کیلئے روانہ ہوچکی ہے ۔ 

آسٹریلوی محکمہ موسمیات نے 13 نومبر اتوار کو میلبورن میں 95 فیصد بارش کی پیشگوئی کی ہے ۔

ورلڈ کپ کی پلیئنگ کنڈیشنز کے مطابق اتوار کو  اگر 10،10 اورز نہ کھیلے گئے   تو فائنل ریزرو ڈے پرکھیلا جائے گا۔

ٹورنامنٹ قوانین کے مطابق میچ مکمل کرنے کیلئے کم از کم 10اوورز کا کھیل مکمل کرنا لازمی ہے۔

دوسری جانب پیر کو بھی میلبورن میں بارش کی پیش گوئی ہے، اگر بارش نے میچ مکمل نہ ہونے دیا تو دونوں ٹیمیں مشترکہ چیمپئن ہوں گی۔

واضح رہے کہ آسٹریلیا کے موسم کے بارے میں کہا جاتا ہے کہ یہ کبھی بھی تبدیل ہوسکتا ہے اور خاصا غیر متوقع رہتا ہے ۔ 

میلبورن میں بارش کے باعث  ایونٹ کے 3 میچز پہلے ہی منسوخ ہوچکے ہیں جبکہ ایک کا نتیجہ ڈک ورتھ میتھڈ سے حاصل کیا گیا۔

یاد رہے کہ پاکستان گزشتہ روز سڈنی میں کھیلے گئے سیمی فائنل میں نیوزی لینڈ کو 7 وکٹوں سے شکست دے کر فائنل میں پہنچنے والی پہلی ٹیم بنی تھی۔