پاکستان اور انگلینڈ کے درمیان ٹیسٹ میچوں کی ٹکٹوں کی فروخت جاری

رپورٹس کے مطابق پاکستان اور انگلینڈ کے درمیان دسمبر میں 3 ٹیسٹ میچز کی سیریز کھیلی جانی ہے۔ 

اس سلسلے  میں شائقین آن لائن بھی میچ کی ٹکٹس بُک کرا سکتے ہیں ۔ ملتان اور کراچی کے ٹیسٹ میچز کے لیے آن لائن ٹکٹوں کی فروخت آئندہ ہفتے شروع ہوگی۔

ٹیسٹ سیریز کے لیے انگلینڈ کرکٹ ٹیم کی 27 نومبر کو پاکستان آمد شیڈول ہے۔

پاکستان اور انگلینڈ کے درمیان پنڈی ٹیسٹ یکم دسمبر کو شروع ہوگا ۔  دوسرا ٹیسٹ 9 دسمبر سے ملتان اور تیسرا 17 دسمبر سے کراچی میں کھیلا جائے گا۔

دوسری جانب پاکستان اور انگلینڈ کے درمیان ٹیسٹ سیریز کے لئے قومی اسکواڈ تشکیل دینے کی غرض سے سلیکشن کمیٹی، کپتان اور ہیڈ کوچ کی آن لائن میٹنگ طلب کرلی گئی ہے۔

اجلاس میں ہیڈ کوچ ثقلین مشتاق اور چیف سلیکٹر محمد وسیم اسلام آباد سے جبکہ کپتان بابر اعظم لاہور سے آن لائن شرکت کریں گے۔

ٹیسٹ سیریز کے لیے آئندہ ہفتے کے آغاز میں پاکستان ٹیم کے اسکواڈ کا اعلان کیا جاسکتا ہے۔  

انگلینڈ کے خلاف اعلان کردہ ٹیسٹ اسکواڈ کے کھلاڑیوں کو 24 نومبر سے راولپنڈی میں رپورٹ کرنے کی ہدایت کی جائے گی اور 25 نومبر سے ٹریننگ کیمپ راولپنڈی میں شروع ہوجائے گا۔