کورونا کیسز میں اضافہ ، کراچی کے مختلف علاقوں میں مائیکروسمارٹ لاک ڈاؤن نافذ

تفصیلات کے مطابق کراچی کے ضلع کیماڑی کے تین سب ڈویژنز بلدیہ ٹاؤن، سائٹ ایریا اور کیماڑی کے علاقوں میں کورونا کیسز میں پھیلاؤ کے خدشے کے باعث 21 اپریل سے 4 مئی تک مائکرو سمارٹ لاک ڈاؤن  نافذ کر دیا گیا  ۔ انتظامیہ کی جانب سے نوٹیفکیشن بھی جاری کر دیا گیا۔ انتظامیہ کی جانب سے متاثرہ علاقوں میں ماسک لازمی قرار دے دیا گیاجبکہ غیر ضروری نقل وحرکت پر بھی پابندی عائد کردی گئی ہے ۔ ان  متاثرہ علاقوں میں اجتماعات،  تقریبات، کاروباری سرگرمیاں ایس اوپیز کے مطابق ہوں گی ۔نوٹیفکیشن کے مطابق  کورونا   مثبت  متاثر ہ  افراد اپنے گھروں میں قرنطینہ میں رہیں گے ۔

اس سے قبل اتوار کے روز  حکومت پنجاب نے  بھی کورونا ٹیسٹ مثبت شرح والے علاقوں میں سمارٹ لاک ڈاؤن لگایا گیا ، راولپنڈی میں تکبیر لین محلہ اڈیالہ،جوڈیشل اپارٹمنٹس نزدایکسائز ٹیکسیشن آفس سول لائنز،کشمیرہاوس بالمقابل مندرہ ،محلہ گلشن سید چکری روڈ،کمال آبادگلی نمبر 3 ٹینچ بھٹہ کے علاقوں میں سمارٹ لاک ڈاؤن لگا دیا گیا ،سمارٹ لاک ڈاؤن میں لین نمبر 5پشاور روڈ ، ہاشم کالونی محلہ لال رخ واہ کینٹ کے علاقے شامل ہیں۔ لاک ڈاؤن والے علاقوں میں تمام شاپنگ مالز،ریسٹورانٹ،دفاتر (نجی اور سرکاری) بند رہیں گے۔علاقہ مکینوں کی نقل و حمل محدود ہو گی ،انتہائی ضرورت کے پیش نظر ایک فرد ایک سواری استعمال کر سکے گا۔ہر قسم کے اجتماعات پر مکمل پابندی ہو گی ۔

واضح رہے کہ ملک  میں کورونا وائرس کی تیسری لہر جاری ہے اور یومیہ کیسز اور اموات میں اضافہ دیکھا جارہا ہے ۔ نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق گزشتہ 24 گھنٹوں میں کورونا سے مزید148افراد چل بسے ۔ ملک میں  اموات کی مجموعی تعداد 16 ہزار600ہوگئی ہے،جبکہ  متاثرہ افراد کی مجموعی تعداد 7 لاکھ 72ہزار 381ہو گئی ہے ۔ گزشتہ روز مثبت کیسز کی شرح 11.62 فیصد رہی ہے ۔