سعودی ولی عہد محمد بن سلمان کا ایران کیساتھ اچھے تعلقات کی خواہش کا اظہار

غیر ملکی خبر رساں ادارے کے مطابق  سعودی عرب کا ایران سے متعلق موقف نرم پڑنے لگا،سعودی ولی عہد محمد بن سلمان نے مقامی نیوز ایجنسی کو انٹرویو دیا جس میں  سعودی ولی عہد نے ایران کیساتھ اچھے تعلقات کی خواہش کا اظہار کیا۔

سعودی ولی عہد محمد بن سلمان نے کہا کہ  ایران ہمارا ہمسایہ ملک ہے،ہم ایران کیساتھ اچھے اور خاص تعلقات چاہتے ہیں،  ہم ایران کو مشکل میں نہیں بلکہ ترقی دیکھنا چاہتے ہیں،ہم خطے اور دنیاکو استحکام کی جانب لے کر جانا چاہتے ہیں،  بہتر  تعلقات کیلئے سعودی عرب  بین الاقوامی حامیوں  کیساتھ ایران کے منفی رویے کا حل نکالنے کی کوشش کررہاہے۔

خیال رہے کہ  اپنے گزشتہ انٹرویوز میں سعودی ولی عہد ایران پر خطے میں عدم استحکام پھیلانے کے حوالے سے کڑی تنقید کرتے آئے ہیں۔اس سے قبل بغداد میں ایرانی  اور سعودی افسران کےدرمیان ملاقات  کی رپورٹ سامنے آچکی ہے۔

90  منٹ کے انٹرویو میں سعودی ولی عہد نے امریکہ کیساتھ سعودی عرب کے تعلقات پر بھی بات کی۔

سعودی ولی عہد محمد بن سلمان نے انٹریو میں کہا کہ  کئی اختلافات کے باوجود امریکہ اور سعودی عرب اسٹریٹجک پارٹنرز ہیں ، سعودی اور امریکی مفاد پر ہم جوبائیڈن انتظامیہ سے 90 فیصد تک متفق ہیں، تعلقات مضبوط کرنے پر کام جاری ہے۔