پاکستانی سائنسدانوں نے پہلا آئی سی یو وینٹی لیٹر تیار کرلیا

پاکستان ایٹمى توانائی کمیشن کے سائنسدانوں نے بڑی کامیابی حاصل کرلی ۔ترجمان پی اے ای سی ڈاکٹر ریاض خان کا کہنا ہے کہ  ملکى وسائل سے پہلا آئى سى یووینٹى لیٹرتیارکرلیا گیا، ڈرگ ریگولیٹری اتھارٹی (‎ ‎ڈریپ)  نے وینٹی لیٹرزکے استعمال اورتیاری کی منظوری دے دی ہے،

پاکستان ایٹمى توانائى کمیشن  نے کرونا وبا کے تناظر میں ملکی وسائل سے پہلا آئی سی یو وینٹى لیٹر  آئی لیو (i-Live)کے نام سے متعارف کرا دیا ہے۔ترجمان کا کہنا ہے کہ  یہ و ینٹى لیٹر پاکستان ایٹمى توانائی کمیشن کے سائنسدانوں اور انجینئرز  نے مروجہ طبى معیارات کے مطابق تیار کیا ہے، آئی۔لائیو وینٹیلیٹرز کی تیاری میں پا اے این سی اسپتالوں کے ڈاکٹرز نے بھی معاونت کی ہے۔

ترجمان  پی اے ای سی ڈاکٹر ریاض خان کا کہنا ہے کہ   یہ وینٹی لیٹر پاکستان انوویشن اینڈ ٹیکنالوجی سنٹر  (پی آئی ٹی سی) اور پاکستان انجینئرنگ کونسل (پی ای سی)کے معیارات  پر بھى پورا اترا ہے، اس وینٹیلیٹر مشین کی جناح ہسپتال لاہور میں بھى جانچ کى گئى ۔ جانچ کے بعد طبی اور انجینئرنگ ماہرین نے وینٹیلیٹرز کی منظورہ دی۔ یہ ملک میں تیار کردہ پہلا وینٹیلیٹر  ہے جسے  ڈریپ نے منظور کیا ہے۔

  اس کامیابی پر پاکستان ایٹمى توانائی کمیشن کے چیئرمین محمد نعیم (ہلال امتیاز ۔ ستارہ امتیاز ) نے سائنسدانوں اور انجینئرز  کو مبارکباد دی ہے۔  ڈریپ کی اس فائنل منظورى کے بعد I-Live نامى اس وینٹىلیٹر کى بڑے پیمانے پر تیارى شروع کردى جائے گى۔