فرخ حبیب نے وزیر مملکت برائے اطلاعات کا حلف اٹھا لیا

تفصیلات کے مطابق صدر مملکت عارف علوی نے ایوان صدر میں منعقدہ تقریب میں فرخ  حبیب سے عہدے کا حلف لیا ۔  تقریب میں وفاقی وزراء سمیت اعلیٰ حکام نے شرکت کی، صدر عارف علوی نے وزیر مملکت کا منصب سنبھالنے پر فرخ حبیب کو مبارکباد دی۔

واضح رہے کہ فرخ حبیب عام انتخابات میں فیصل آباد سے قومی اسمبلی کے حلقے این اے 108 سے رکن قومی اسمبلی منتخب ہوئے ۔ وہ تحریک انصاف  کی طلبہ تنظیم انصاف اسٹوڈنٹ فیڈریشن  (آئی ایس ایف) کے صدر بھی رہے ہیں۔فرخ حبیب الیکشن کمیشن میں پی ٹی آئی فارن فنڈنگ کیس میں فریق کے طور پر اپنی جماعت کی نمائندگی کر رہے ہیں۔

خیال رہے کہ فواد چوہدری کو رواں ماہ وزیراطلاعات و نشریات کا قلم دان سونپ دیا گیا تھا۔ چند ہفتے قبل گزشتہ روز وزیراعظم عمران خان نے کابینہ میں ردوبدل کی تھی، جس میں شوکت ترین کو حماد اظہر کی جگہ وزارت خزانہ کی ذمہ داری سونپی گئی جبکہ فواد چوہدری کو وزارت اطلاعات کا قلمدان دے کر شبلی فراز کو وزیر سائنس و ٹیکنالوجی بنایا گیا تھا ۔بعد ازاں سینیٹر شبلی فراز اور شوکت ترین نے اپنے اپنے عہدوں کا حلف اٹھایا تھا۔