عید الفطرکے موقع پرویکسینیشن سنٹرزبند رکھنے کا فیصلہ

ذرائع کے مطابق  نیشنل کمانڈ  آپریشن سینٹر (این سی او سی) نے  عید الفطرکے موقع پرویکسینیشن سنٹرزبند رکھنے کا فیصلہ کرلیا، ملک بھرکے ویکسینیشن سنٹرز13،14،15 مئی کوبند رہیں گے۔

ذرائع کے مطابق  این سی اوسی نے ویکسینیشن سنٹرزکی عید تعطیلات کی منظوری دیدی۔ ‎ملک بھرکے ویکسینیشن سنٹرزیکم مئی کوکھلے رکھنے کا فیصلہ کیا گیا ہے، یکم مئی کوویکسینیشن سنٹرزکھولنے کا فیصلہ عوامی سہولت کیلیے کیا گیا۔جبکہ  ہیلتھ کیئر ورکرز کی رجسٹریشن 31 مئی تک جاری رکھنے کا فیصلہ کیا گیا ہے۔

ملک  میں کورونا وائرس کی تیسری لہر جاری ہے اور یومیہ کیسز اور اموات میں اضافہ دیکھا جارہا ہے ۔ نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق گزشتہ 24 گھنٹوں میں کورونا سے مزید151افراد چل بسے ۔ ملک میں  اموات کی مجموعی تعداد 17 ہزار680ہوگئی ہے،جبکہ  متاثرہ افراد کی مجموعی تعداد 8 لاکھ 15ہزار 711ہو گئی ہے ۔ ملک میں فعال کیسزکی تعداد 89ہزار 838 ہے ۔

پنجاب

پنجاب میں کورونا مریضوں کی تعداد 2لاکھ98ہزار 818ہوگئی ۔ جبکہ صوبے میں اب تک 8ہزار 327افراد جان سے ہاتھ دھو بیٹھے ہیں ۔

سندھ

سندھ میں کورونا وائرس سے سب سے زیادہ متاثرہ مریضوں کی تعداد  2 لاکھ 81ہزار 385ہو گئی جبکہ صوبے میں اب تک 4 ہزار 629 افراد جان کی بازی ہار گئے ۔

خیبرپختون خوا

خیبرپختون خوا میں کورونا وائرس سے متاثرہ مریضوں کی تعدادایک لاکھ 16ہزار523ہوچکی ہے ۔ صوبے میں 3238افراد چل بسے۔

بلوچستان

بلوچستان میں کورونا وائرس کے اب تک 22ہزار118کیسز رپورٹ ہوئے ہیں جبکہ صوبے میں 233مریض چل بسے ۔

اسلام آباد

وفاقی دارالحکومت اسلام آباد میں مجموعی طورپرمتاثرہ افراد کی تعداد74 ہزار640جبکہ اموات کی تعداد677تک جاپہنچی ۔

گلگت بلتستان

گلگت بلتستان میں اب تک 5 ہزار 296افراد کورونا کا شکار ہوئے ہیں جبکہ 106افراد جان سے ہاتھ دھو بیٹھے ۔

آزاد کشمیر

آزاد جموں کشمیرمیں کورونا سےمتاثرہ افراد کی تعداد 16 ہزار931ہوچکی ہے جبکہ470افراد جان کی بازی ہار گئے ۔

ملک بھرمیں صحت یاب ہونے والے افراد کی تعداد بھی تیزی سے بڑھنے لگی ہے، این سی اوسی کے مطابق گزشتہ  24گھنٹوں میں  3699فرادکوروناوائرس کوشکست دےچکے ہیں۔ ملک بھر میں اب تک 7لاکھ 08 ہزار193مریض کورونا کو شکست دے چکے ہیں ۔