فیس بک کا صحافیوں کو لاکھوں ڈالر دینے کا اعلان

غیر ملکی خبررساں ادارے کے مطابق  مشہور سماجی رابطے کی ویب سائٹ فیس بک کی جانب سے کہا گیا ہے کہ وہ 50 لاکھ ڈالر مقامی صحافیوں کو دینے جا رہا ہے۔ فیس بک انتظامیہ کا کہنا ہے کہ نئے اشاعتی پلیٹ فارم کے لیے آزاد لکھاریوں کو کام کرنے کا موقع دیا جائے گا۔

کمپنی کا کہنا ہے کہ " ان رپورٹرز پر توجہ دی جائے گی جو عام طور پر کسی کمیونٹی کی اکیلی آواز ہوتے ہیں۔"

 یہ  اشاعتی پلیٹ فارم فیس بک پیجز کے ساتھ جڑا ہو گا، جس میں صحافیوں کے لیے فری سیلف پبلشنگ ٹول بھی ہوگا۔جس  کے ذریعے وہ نیوز لیٹرز بھیج سکیں گے یا پھر اسے اپنی ویب سائٹ بنانے کے لیے بھی استعمال کر سکیں گے۔

کمپنی کی جانب سے یہ بھی کہا گیا ہے " صحافی فیس بک ٹولز کے ذریعے کہانیوں کی اشاعت کی بدولت اضافی پیسے کمانے کے بھی قابل ہوں گے۔ اس عمل کا آغاز سبسکرپشن سے ہو گا اور ہر لکھاری اپنے پیسے خود طے کر سکتا ہے۔"

فیس بک کے مطابق  نئے لکھنے والوں کیساتھ نئے اشاعتی پلیٹ فارم کے لئے معاہدے کئے جائیں گے۔ یہ معاہدے ایسے صحافیوں یا نئے لکھاریوں کیساتھ کئے جائیں گے۔ جو سوشل میڈیا کے ذریعے پیسے کمانا چاہتے ہیں اور اپنی تحریروں سے صارفین کو متوجہ کرنے کی صلاحیت رکھتے ہوں۔

خیال رہے کہ اس اشاعتی پلیٹ فارم کا اعلان فیس بک نے کچھ عرصہ قبل ہی کیا تھا۔