امریکا جوہری معاہدے کی بحالی کے لیے پختہ عزم اور اعتماد کو ظاہر کرے، ایرانی صدر

نیویارک: ایران کے صدر ابراہیم رئیسی نے کہا ہے کہ امریکا کو 2015 کےجوہری معاہدے کی بحالی کے لیے اپنے پختہ عزم اور اعتماد کو ثابت کرنا ہو گا۔

برطانوی خبر رساں ادارے کے مطابق انہوں نے نیویارک میں اقوام متحدہ کی جنرل اسمبلی کے اجلاس سے خطاب کے دوران کہا کہ امریکا نے جوہری معاہدے جے سی پی او اے سے دستبردار ہو کر معاہدے کی خلاف ورزی کی ہے۔ اگر امریکا جوہری معاہدے کی بحالی چاہتا ہے تو اسے اپنے ارادے کی پختگی ظاہر کرنا چاہیے۔

انہوں نے کہا کہ وقت آ گیا ہے کہ امریکا درست راستے کا انتخاب کرے اور اسے حقیقی آمادگی کا اظہار کرنے کے لیے اعتماد پیدا کرنا چاہیے۔

واضح رہے کہ سابق امریکی صدر ڈونلڈ ٹرمپ نے 2018 میں امریکا کو ایران کے ساتھ ہونے والے جوہری معاہدے سے نکال دیا تھا ۔ اس کے بعد انہوں نے ایران پر مزید پابندیاں عائد کر دی تھیں۔