نائیجیریا کی یونیورسٹی ہاسٹل سے 24 طالبات سمیت 30 سے ​​زائد افراد اغوا

نائیجیریا کی شمال مغربی ریاست زمفارا میں درجنوں مسلح افراد نے ایک یونیورسٹی کے ہاسٹل سے کم از کم 24 طالبات سمیت 30 سے ​​زائد افراد کو اغوا کر لیا ہے۔

غیر ملکی خبر رساں ایجنسی کے مطابق یونیورسٹی کے قریب رہائشیوں نے میڈیا کو بتایا کہ جرائم پیشہ گروہوں کے بندوق بردار گذشتہ روز کو ریاست کے دارالحکومت گوساؤ سے باہر فیڈرل یونیورسٹی کے قریب سبون گیدا گاؤں پر حملہ کرکے تین خواتین ہاسٹلز کی 24 طالبات کو ساتھ لے گئے۔

نائیجیریا کے صدر بولا احمد تینوبو کے اقتدار میں آنے اور ملک کی سلامتی کے چینلجز سے نمٹنے کے وعدے کے بعد یہ پہلی واردات بتائی جاتی ہے۔سبون گیدا کے رہائشی صحابی موسیٰ نے بتایا ہے کہ اغوا کار موٹر سائیکلوں پر گاؤں میں داخل ہوئے اور ہاسٹل میں گھس گئے اور کھڑکیاں توڑ کر طالبات کے کمروں تک پہنچ گئے۔

ریاست کی پولیس کے ترجمان یزید ابوبکر نے اس واقعے کی تصدیق کرتے ہوئے تفصیلات فراہم کرنے سے انکار کردیا ہے اور بتایا ہے کہ سکیورٹی اہلکار طالبات کی رہائی کے لیے کام کر رہے ہیں