سعودیہ عرب میں عید جمعرات کو ہوگی

عرب میڈیا رپورٹ کے مطابق سعودی عرب میں 29ویں روزے کو ماہِ شوّال کا چاند دیکھنے کے لیے سُمیر اور تومیر کے مقامات پر سرکاری کمیٹی کے اراکین  اور ماہرینِ فلکیات جمع ہیں۔

ماہِ شوال کا چاند سے متعلق باضابطہ اعلان سعودی عرب کے مقامی وقت کے مطابق شام 7 بج کر 15 منٹ پر کیا جائے گا۔ اگر آج ماہِ شوال کے چاند کی رویت ہوجاتی ہے تو سعودی عرب سمیت تمام خلیجی ممالک میں کل عید الفطر منائی جائے گی۔

دوسری جانب ماہرین فلکیات کے چیف عبداللہ الخودیری نے کہا کہ ’آج چاند نظر آنے کے امکانات بہت کم ہیں کیونکہ آج شام کو چاند کی پیدائش ہوگی اور وہ کل افق پر نمودار ہوگا‘۔

اگر سعودی عرب میں آج چاند نظر نہیں آیا تو شرعی طریقے کے عین مطابق کل تیسواں روزہ رکھا جائے گا اور عید الفطر پرسوں یعنی جمعرات 13 مئی کو منائی جائے گی۔

واضح رہے کہ سعودی حکومت نے عید الفطر کے حوالے سے گائیڈ لائن جاری کی ہے۔ جس کے مطابق بیس سے زائد افراد کے اجتماع کی اجازت نہیں ہوگی۔

سعودی عرب میں وزارت صحت کے ترجمان ڈاکٹر محمد العبد العالی نے خبردار کیا تھا کہ کرونا کے پیش نظر بیس سے زائد افراد کسی بھی مقام پر جمع نہ ہوں۔

سعودی حکومت نے عید الفطر کے حوالے سے سرکاری تعطیلات کا اعلان کردیا ہے، جس کے بعد عید الفطر پر سرکاری دفاتر میں 12 جبکہ نجی شعبے میں چار تعطیلات ہوں گی۔

سرکاری اداروں کے ملازمین کی عید تعطیلات جمعرات 6 مئی سے شروع ہوں گی اور پیر 17 مئی 2021 کو چھٹی کا آخری دن ہوگا۔ تمام سرکاری دفاتر منگل 18 مئی سے معمول کے مطابق امور انجام دیں گے۔ وزارت افرادی قوت نے بتایا تھا کہ بغیر منافع والے اور نجی سیکٹر کے ملازمین کی چھٹیاں چار دن کی ہوں گی جن کا آغاز منگل 11 مئی سے ہوگا۔