کراچی طیارہ حادثہ : ماڈل زارا عابد کا خاندان تاحال مالی امداد کامنتظر

گزشتہ برس  لاہور سے کراچی آنیوالی    پی آئی اے کی پرواز پی کے   8303 میں سوا ر 97  مسافر  زندگی کی بازی ہار گئے ،  حادثے میں جاں بحق ہونیوالوں میں    معروف ماڈل زارا عابد بھی سوارتھیں   جو عید منانے کیلئے اپنے گھر آرہی تھیں لیکن شایدانہیں اپنے گھروالوں سے   ملنا منظور ہی نہ تھا ۔

زارا اپنی بیوہ ماں اوردو  بھائیوں کا واحد سہارا تھیں اور حادثے کے بعدسے  ان کاخاندان کافی مشکلات سے  گزررہا ہے ۔ زارا کی والدہ کا کہنا ہے کہ "زارا  کی یادیں  ان کے دل میں زندہ ہیں ،وہ خوابوں میں آکر انہیں تسلی دیتی ہیں ۔ زارا کی چیزیں آج بھی ان کے کمرے میں جوں کی توں رکھی ہیں  اور ان  کے زخم آج بھی تازہ ہیں۔ انہوں نے بتایا کہ زارا ہی گھر کی کفالت کررہی تھیں اور ابھی تک انہیں انشورنس کی رقم تک نہیں ملی  ہے ،وہ  لوگوں سے قرضہ لے کر گزارہ کرنے پر مجبور ہیں ۔ زارا کے بھائی بھی اپنی بہن کی شفقت اور محبت کو یاد کرتے ہیں ۔ زارا عابد کی موت کو ایک برس کا عرصہ گزر گیا ہے اور   ان کی والدہ تاحال مالی امداد کی منتظر ہیں ۔

یاد رہے کہ پاکستان انٹرنیشنل ائیرلائنز (پی آئی اے)  نے حادثے کے شہداء کے لواحقین کو انشورنس کی مد میں  ایک کروڑ روپے معاوضہ ادا کرنے کا اعلان کیا تھا۔

27سالہ  زار ا عابد پاکستان فیشن انڈسٹری  کی ابھرتی ہوئی ماڈل تھیں  اورانہوں نے  مختصر کیرئیر میں انڈسٹری کے  کئی معروف ڈیزائنرز کے ساتھ کام کیا، زارا نے کیرئیر کا آغاز ثنا سفیناز کے ساتھ کیا اور وہ  بہت جلد عظیم سجاد کی فلم چوہدری سے بڑی اسکرین پر بھی ڈیبیو کرنے والی تھیں۔ زارا عابد نے 10 منٹ دورانیے کی فلم سکہ بھی انہوں نے اداکاری کے جوہر دکھائے  جو اس المناک حادثے کے بعد یوٹیوب پر ریلیز کی گئی ۔ انہوں نے 2020 میں ہی   اسٹائل ایوارڈز میں بہترین فیمیل ماڈل کا ایوارڈ  بھی اپنے نام کیا تھا۔