فلسطینیوں کو امداد کی رسائی کے لیے مصر کا غزہ کے ساتھ سرحد کھولنے کا فیصلہ

مصرنے غزہ کی پٹی کے ساتھ اپنی سرحدکھولنے پراتفاق کیاہے تاکہ پھنسے ہوئے فلسطینی عوام کو امداد پہنچائی جاسکے۔

امریکی صدرجوبائیڈن اورمصری صدرعبدالفتح السیسی کے درمیان ٹیلی فون پر گفتگو کے بعدوائٹ ہائوس کے ترجمان نے کہاکہ انسانی امداد کے تقریباً بیس ٹرک آئندہ چند روز میں مصر کے Sinai جزیرہ سے غزہ میں داخل ہوںگے۔

مصری صدرنے ایک الگ بیان میں کہاکہ مصر فلسطینیوں کی Sinaiمیں زبردستی بے دخلی کو مسترد کرتاہے اورایسا کوئی بھی اقدام مصرکے جزیرے کواسرائیلی کے خلاف حملوں کے لئے ایک اڈے میں تبدیل کردے گا۔ادھرغزہ میں اسرائیل کے فضائی حملے جاری ہیں جہاں رات کئی اہداف کو نشانہ بنایاگیا جس کے بعد انسانی بحران مزیدشدیدہوگیاہے۔

اسلامی ممالک لبنان،اردن،لیبیا، یمن، تیونس، مراکش اورایران میں غزہ کے ہسپتال پر مہلک حملے کے خلاف احتجاجی مظاہرے ہوئے۔ادھرایران کے صدرابراہیم رئیسی نے خبردارکیاہے کہ اسلامی ممالک فلسطین میں روارکھے گئے جرائم کابدلہ لیںگے۔

تہران میں فلسطینی عوام کے ساتھ اظہاریکجہتی کے لئے منعقدہ ایک اجتماع سے خطاب کرتے ہوئے انہوں نے کہاکہ ہسپتال پرحملہ صیہونی حکومت کے خاتمے کاسبب بنے گا۔