راولپنڈی : ٹریفک پولیس کا لاک ڈاؤن اور عید الفطر کیلئے منظم اور جامع ٹریفک پلان جاری

تفصیلات کے مطابق   سٹی ٹریفک پولیس راولپنڈی نے لاک ڈاﺅن اور عید الفطر کے لیے منظم اور جامع ٹریفک پلان جاری کردیا ہے۔

چیف ٹریفک آفیسر راولپنڈی کا کہنا ہے کہ   لاک ڈاﺅن اور عید الفطر کے دوران ٹریفک پولیس کے 623اہلکار ڈیوٹی کے فرائض سر انجام دیں گے۔

سی ٹی او رائے مظہر اقبال  کا کہنا ہے کہ   حکومتی احکامات پر عمل در آمد کروانے کے لیے مری میں سیاحوں کے داخلے پر مکمل پابندی ہو گی۔  مری جانے والے تمام داخلی اوراندرونی راستوں پرسیاحوں کو روکنے کے لیے13پکٹس قائم کر دی گئیں۔ ون ویلنگ اور کار سکٹنگ کی روک تھام کےلئے 33پکٹس قائم کرنے کے ساتھ سپیشل سکواڈز بھی بنائے گئے ہیں۔

سی ٹی او راولپنڈی رائے مظہر اقبال کا کہنا ہے کہ  مساجد ، امام بارگاہوں اور جہاں عید کی نماز ادا کی جائے گی وہاں اضافی نفری تعینات کی جائے گی۔اہم شاہراہوں ،رش والے مقامات اور خصوصی پکٹس پر ٹریفک پولیس بھر پور محنت کے ساتھ ڈیوٹی سر انجا م دے گی۔  سکیورٹی کے پیش نظر کالے شیشے اور بغیر نمبر پلیٹ گاڑیوں اور موٹر سائیکلوں کے خلاف سخت قانونی کاروائی کی جائے گی۔ دیگر اداروں کے ساتھ ملکر ٹیم ورک اور مکمل کوآرڈینشن کے ساتھ فرائض کی ادائیگی کو یقینی بنائیں۔