غزہ پر حملے رُکوائے جائیں، او آئی سی سیکرٹری جنرل کے عالمی فریقین کو خطوط

ریاض: اسلامی تعاون تنظیم (او آئی سی) کے سیکرٹری جنرل حسین ابراہیم طہٰ نے عالمی فریقن سے اسرائیلی جارحیت بند کرانے کے لیے کردار ادا کرنے کا مطالبہ اور فلسطینی عوام کے لیے بین الاقوامی تحفظ اور فوری امدادی مہم چلانے پر زور دیا ہے۔

سعودی خبررساں ادارے کے مطابق او آئی سی کے سیکرٹری جنرل نے بین الاقوامی فریقین، اقوام متحدہ کی سلامتی کونسل کے مستقل رکن ممالک، اقوام متحدہ کے سیکرٹری جنرل، یورپی یونین میں خارجہ پالیسی کے عہدیدار، ریڈ کراس کے سربراہ اور اقوام متحدہ کے ماتحت انسانی حقوق کے ہائی کمشنر کے نام خطوط لکھے ہیں۔

جس میں کہا گیا ہے کہ غزہ میں فلسطینی عوام کے خلاف اسرائیلی جارحیت جاری ہےجسے بند کرانے کے لیے عالمی فریق اپنا کردار ادا کریں۔بیان میں کہا گیا ہے کہ فلسطینیوں کو بین الاقوامی تحفظ فراہم کرنے، بنیادی ضروری کی فراہمی اور ہنگامی امداد بھیجنے کا اہتمام ضروری ہے۔