راحت فتح علی خان کا امریکی ویزہ مسترد

اسلام آباد: اسلام آباد میں امریکی سفارت خانے نے پاکستانی گلوکار راحت فتح علی خان کو 2015 سے 2023 کے درمیان امریکا میں حاصل ہونے والی آمدنی پر ٹیکس ادا نہ کرنے کی وجہ سے کنسرٹ کے لیے ویزا دینے سے انکار کردیا۔

امریکی سفارتخانے نے کہا کہ ویزا حاصل کرنے کے لیے گلوکار کو 2015 سے 2023 تک ٹیکس ادائیگیوں سے متعلق آئی آر ایس دستاویزات اور بالی ووڈ ایونٹس ایل ایل سی کی قانونی دستاویزات فراہم کرنا ہوں گی۔ تاہم راحت فتح علی خان کا دعویٰ ہے کہ انہوں نے تمام ٹیکس امریکا میں اپنے پروموٹرز کے ذریعے ادا کیے تھے۔

راحت فتح نے اس حوالے سے بتایا کہ انہوں نے اپنے پروموٹرز سے رابطہ کیا ہے اور ان سے کہا ہے کہ وہ ٹیکس کی ادائیگی کے لیے مطلوبہ دستاویزات فراہم کریں جو کہ سفارت خانے کو جمع کرائی جائیں گی۔

گلوکار نے مزید کہا کہ وہ اس سال امریکہ گئے تھے اور اگر انہوں نے مذکورہ مدت تک ٹیکس ادا نہ کیا ہوتا تو سفارت خانہ پہلے ویزا جاری نہ کرتا۔

راحت فتح علی خان کو 18 نومبر 2023 کو ایسوسی ایشن آف پاکستانی فزیشنز آف نارتھ امریکہ کے زیر اہتمام میوزیکل شو میں شرکت کے لیے امریکہ جانا تھا۔

کنسرٹ کی بکنگ راحت فتح علی خان کے پروموٹر ریحان صدیقی نے کی تھی، جنہوں نے خود گلوکار کے ویزے کے لیے درخواست دی تھی اور سفارت خانے کو ضروری دستاویزات فراہم کی تھیں۔ تاہم، سفارت خانے نے 2015-23 کے دوران ٹیکس کے مسائل کا حوالہ دیتے ہوئے گلوکار کا ویزا مسترد کر دیا۔

دستاویزات سے پتہ چلتا ہے کہ اس سے قبل پاکستانی گلوکار چار مختلف پروموٹرز کے ذریعے امریکہ جا چکے ہیں جن میں دی میوزک ورلڈ ایل ایل سی، دی وائبرینٹ میڈیا گروپ ایل ایل سی، دیسی فیسٹ 2018 ایل ایل سی اور سائی پروڈکشن شامل ہیں۔