سمارٹ لاک ڈاون کے باعث لاہور کے تھیٹرز کے اوقات کار تبدیل کر دئیے گئے

لاہور:سمارٹ لاک ڈاون کے باعث لاہور کے تھیٹرز کے اوقات کار تبدیل کر دئیے گئے جبکہ فنکار برادری  کا کہنا ہے کہ اوقات کار کی تبدیلی سے تھیٹر انڈسٹری بری طرح متاثر ہو رہی ہے، پرانے اوقات کار بحال کیے جائیں۔ 

تفصیلات کے مطابق پرنس تھیٹر لاہور میں میڈیا  سے گفتگو کرتے ہوئے تھیٹر فنکاروں، پروڈیوسر اور ڈائریکٹر کا کہنا تھا طویل عرصہ سے لاہور سمیت پنجاب بھر میں ڈرامہ رات گیارہ تا ایک بجے پیش کیا جاتا ہے لیکن موجودہ صورتحال کے باعث  ڈرامے کا وقت  آٹھ تا دس بجے  کیا  گیا ہے۔

فنکار برادری کا مزید کہنا تھا کہ آٹھ بجے تمام مارکیٹیں اور دکانیں بند کر دی جاتی ہیں اور ڈرامہ بین  دیگر مصروفیات کے باعث نہیں پہنچ پاتے،اس لیے پرانے اوقات کار بحال کیے جائیں۔ کیونکہ اس کے باعث ہمیں مشکلات درپیش ہیں۔

فنکار برادری نے  کہا کہ ہم حکومتی اقدامات کی حمایت کرتے ہیں لیکن حکومت ہماری مجبوریاں بھی سمجھے۔

پریس کانفرنس میں ڈرامہ رائٹر ڈائریکٹر ڈاکٹر اجمل ملک، پروڈیوسر سید محمد یوسف، اداکار شاہد خان، حامد رنگیلا، اداکارہ نازلی، نور ، نیسرہ نور، وجیہہ علی، عقیل حیدر اور دیگر شامل تھے۔