آسٹریلوی گلوکار، اداکار جانی روفو انتقال کر گئے

پرتھ: آسٹریلوی گلوکار اور ہوم اینڈ اوے اداکار جانی روفو 35 سال کی عمر میں انتقال کر گئے۔

غیر ملکی میڈیا رپورٹس کے مطابق آسٹریلوی ٹیلی ویژن اسٹار اور گلوکار جانی روفو دماغی کینسر میں مبتلا ہونے کے بعد 35 سال کی عمر میں انتقال کر گئے ہیں۔

جانی روفو کو 2017 میں دماغی کینسر کی تشخیص ہوئی تھی جس کے بعد انہوں نے آسٹریلیا میں اس مرض کے لیے فنڈ ریزنگ اور آگاہی مہم میں حصہ لیا۔

ٹی وی سٹار کے اہل خانہ نے ایک بیان میں کہا کہ وہ بیماری سے آخری دم تک لڑتے ہوئے جمعہ کو انتقال کر گئے اور انہیں ایک باصلاحیت اور دلکش لڑکے کے طور پر یاد رکھا جائے گا۔

روفو مغربی آسٹریلیا کے شہر پرتھ میں پیدا ہوئے اور کینسر کی تشخیص کے بعد کام سے وقفہ لے لیا۔

واضح رہے کہ جانی روفو نے ریئلٹی شو ایکس فیکٹر آسٹریلیا سے شہرت حاصل کی۔