نواز شریف 4 دن کےلئے جیل میں چلے جاتے تو ان کا قد بڑھ جاتا، رہنما پیپلز پارٹی

رہنما پیپلز پارٹی خورشید شاہ کا کہنا ہے وزیر اعظم لاہور سے آئے یا لاڑکانہ سے بس ووٹ کی طاقت سے آنا چاہیے، نواز شریف 4 دن کےلئے جیل میں چلے جاتے تو ان کا قد بڑھ جاتا۔گھوڑے پر بیٹھ کر مولا جٹ کی طرح آتے تو ان کی عزت میں اضافہ ہوتا۔

لاہور میں میڈیا سے گفتگو کرتے ہوئے خورشید شاہ نے کہا کہ سلیکشن ہوئی تو ملک کا فائدہ نہیں بلکہ نقصان ہوگا، اگر میاں صاحب سیدھے 4 دن کے لئے جیل چلے جاتے تو سیاستدانوں کا قد بڑھ جاتا۔

خورشید شاہ نے کہا کہ پاکستان میں الیکشن نہیں ہو سکیں گے اگر پنکچر کیے گئے ہوں، اگر کسی کو زور زبردستی اقتدار میں بٹھایا گیا تو ناقابل تلافی نقصان ہوگا۔

انہوں نے کہا کہ اگر سلیکشن ہوتی رہی ووٹ استعمال کرنے کا موقع نہ دیا تو نقصان ہوگا عوام سے بات کی جائے، زور زبردستی والی حکومت نہیں چلے گی۔ جب آزادانہ ووٹ ڈالا جاتا ہے تو فیصلے آزادانہ ہوتے ہیں اور ہم سے پوچھیں جو کمٹمنٹ کی وہ پوری کی یا نہیں۔

نواز شریف پر تنقید کرتے ہوئے خورشید شاہ نے کہا کہ موٹروے کے علاوہ انہوں نے کیا کیا؟ تجارت کے لیے موٹروے نہیں پورٹ بنایا جاتا ہے، بجلی کے کارخانے لگائے کھربوں کا نقصان ہوگیا تھر کول چل رہا ہے 2600 میگا واٹ بجلی مل رہی ہے۔ وزیر اعظم لاڑکانہ کا ہو یا لاہور کا ووٹ کے ذریعے روکیں لاٹھی کے ذریعے نہ روکیں۔

انہوں نے کہا کہ چار دن جیل جاتے میاں صاحب کا قد بڑھ جاتا لیکن نئی روایت بن گئی ہے کہ ہائی کورٹ چلے جائیں تو ریڈ کارپٹ بچھا کر خوش آمدید کہا جاتا ہے، جیل نہ جانے سے نوازشریف کا قد چھوٹا ہوا ہے بڑا نہیں ہوا۔

پیپلز پارٹی رہنما کا کہنا تھا کہ گورنر ہاؤس میں نواز شریف کے سیاسی فیصلوں پر کہوں گا کہ پاکستان کے عوام کو دیکھنا چاہیے ان کے ساتھ کیا ہو رہا ہے، ووٹ پر ڈاکا ڈالنے کے لیے سب کچھ ہو رہا ہے۔ اللہ کرے ملک میں جمہوریت بحال ہوجائے انتخابات ہو جائیں۔