لاہور آلودہ شہروں کی درجہ بندی میں چوتھی پوزیشن پر آگیا

لاہور: لاہور میں گزشتہ روز ہونے والی بارش کے بعد موسم سرد ہوگیا اور ہوا کا معیار بھی بہتر ہوگیا۔

تفصیلات کے مطابق آلودہ شہروں کی درجہ بندی میں لاہور چوتھے نمبر پر آگیا ہے۔ شہر کا درجہ حرارت اس وقت 15 ڈگری سیلسیس ریکارڈ کیا جا رہا ہے، جبکہ شہر کا مجموعی ایئر کوالٹی انڈیکس (AQI) اس وقت 163 ہے۔

گلبرگ میں فضائی آلودگی کا تناسب 201، زمان پارک کے ارد گرد 171، مال روڈ کے ارد گرد 166، اپر مال کینال روڈ پر 179 اور شملہ پہاڑی کے ارد گرد 163 ریکارڈ کیا گیا ہے۔

شہر کے AQI میں بہتری کے بعد پنجاب حکومت نے سموگ کی صورتحال میں بہتری کے بعد آج سمارٹ لاک ڈاؤن اٹھا لیا ہے۔

لاک ڈاؤن مستقبل میں فضائی آلودگی کی صورتحال پر نظر رکھ کر نافذ کیا جائے گا۔