بھارتی ریاست کیرالہ میں شدید بارشوں نے تباہی مچادی

غیر ملکی خبر رساں ادارے کے مطابق  بحیرہ عرب میں بننے والے سمندری طوفان  سےبھارت  کے مختلف علاقوں میں شدید بارشوں کا سلسلہ شروع ہوگیا۔بھارتی ریاست کیرالا میں شدید بارشوں نے تباہی مچادی ہے۔متعدد مکانات کی چھتیں گرگئیں اور گھروں میں پانی داخل ہوگیا۔

بیشتر خاندان نقل مکانی پر مجبور ہوگئے ہیں ۔ طوفانی ہواؤں سےدرجنوں درخت جڑ سے اکھڑ گئے اور کئی علاقوں میں پروازیں بھی بندکردی گئیں۔ تیز ہواؤں کے جھکڑ سے پول اور ہورڈنگز سڑکوں پر گر گئے اور عمارتوں کو بھی شدید نقصان پہنچا ہے۔

سمندر میں طوفان سے اونچی لہریں پیدا ہوئیں اور پانی رہائشی علاقے میں داخل ہوگیا ہے، ریسکیو اداروں کے عملے نے متاثرہ علاقے سے شہریوں کو محفوظ مقام پر منتقل کیا۔

محکمہ موسمیات  کے مطابق طوفان کی شدت میں آج مزید اضافہ ہوگا۔ بھارتی ریاست مہاراشٹرا ، گجرات، تامل ناڈواور گووا میں بھی سمندری طوفان سے معمولاتِ زندگی متاثر ہوں گے۔ میونسپل اور ریسکیو اداروں میں پہلے ہی ایمرجنسی نافذ کردی گئی۔