پاکستان اور قازقستان کے درمیان میڈیا دفاتر کھولنے کا فیصلہ

پاکستان اور قازقستان نے ایک دوسرے کے ملکوں میں اپنے سرکاری ذرائع ابلاغ کے اداروں کے دفاتر قائم کرنے پر اتفاق کیا ہے۔

یہ اتفاق رائے آج (بدھ) اسلام آباد میں وزیر اطلاعات و نشریات مرتضی سولنگی اور پاکستان میں قازقستان کے سفیریرزان کستافن  کے درمیان ملاقات میں ہوا۔وزیراطلاعات نے کہا ہمیں سرکاری ذرائع ابلاغ کے اداروں کے درمیان تعاون کے مزید فروغ کی ضرورت ہے انہوں نے کہا کہ ریڈیو پاکستان اور پاکستان ٹیلی ویژن دونوں ملکوں میں معلومات کا اہم ذریعہ ہیں۔

ملاقات میں پاکستان کی وزارت اطلاعات اور قازقستان کی وزارت اطلاعات اور سماجی ترقی کے درمیان مفاہمتی یادداشت پر دستخط کے معاملے پر بھی تبادلہ خیال کیا گیا۔ اس حوالے سے دونوں ممالک کے وزرائے اطلاعات کے درمیان زوم میٹنگ پر بھی اتفاق کیا گیا۔

مرتضی سولنگی نے کہا کہ لاہور سے ایک ٹیم قازقستان میں فلم کی عکس بندی کیلئے جارہی ہے جو دونوں ملکوں کے درمیان ثقافتی تعلقات کے فروغ کی جانب ایک اہم قدم ہے۔ وزیر اطلاعات نے کہا کہ پاکستان کے شنگھائی تعاون تنظیم کے رکن ممالک کے ساتھ گہرے تاریخی اورثقافتی تعلقات ہیں انہوں نے کہا کہ مفادات اور مقاصد وسیع پیمانے پر آپس میں مربوط ہیں۔ قازقستان کے سفیر نے وزیر اطلاعات کو پاکستان کی وزارت اطلاعات و نشریات اور قازقستان کی وزارت اطلاعات و سماجی ترقی کے مابین مفاہمت کی یادداشت پر دستخط کرنے کیلئے قازقستان کے دورے کی دعوت دی۔قازقستان کے سفیر نے کہا کہ قازقستان کے صدر کو پاکستان اور اس کے عوام سے بے پناہ محبت ہے انہوں نے کہا کہ قازقستان کے صدر آئندہ برس پاکستان کا دورہ کریں گے۔ قازقستان کے سفیر نے کہا کہ ہم دونوں ممالک کے سرکاری میڈیا کے درمیان تعاون کو مزید بڑھانا چاہتے ہیں۔