اسموگ کے پیش نظر پنجاب حکومت کے اہم فیصلے

اسموگ کے پیش نظر پنجاب حکومت نے اہم فیصلے کئے ہیں جس کے تحت جمعہ اور ہفتہ کو سکولز بند رکھنے کا فیصلہ کیا ہے جبکہ 24 نومبر کوپنجاب کے 10 اضلاع میں سکول کالجز بند رہیں گے۔

نگران وزیراعلیٰ پنجاب محسن نقوی کی زیر صدارت کابینہ کمیٹی برائے انسداد سموگ کا اجلاس ہوا جس میں سموگ کے تدارک سے متعلق اقدامات بارے غور کیا گیا۔اجلاس میں فیصلہ کیا گیا کہ لاہور سمیت پنجاب کے 10 اضلاع میں جمعہ اور ہفتہ کے روز تعلیمی ادارے بند رہیں گے۔

اجلاس کے بعد میڈیا سے گفتگو کرتے ہوئے نگران وزیراعلیٰ پنجاب محسن نقوی نے کہا کہ پنجاب حکومت نے 10 ہزار طلباء کو الیکٹرک بائیکس پر سبسڈی دینے کا فیصلہ کیا ہے،  مارکیٹوں کو مکمل طور پر بند کرنے کے حق میں نہیں، جمعہ اور ہفتے کو مارکیٹیں دوپہر 3 بجے کھلیں گی جبکہ اتوار کے روز مارکیٹس مکمل طور پر بند رہیں گی۔

محسن نقوی نے کہا کہ سموگ سے متاثرہ اضلاع میں ریستوران بھی جمعہ اور ہفتے کو 3 بجے کے بعد کھلیں گے، اتوار کے روز مال روڈ صبح سے شام 5 بجے تک سائیکل والوں کیلئے کھلا ہو گا۔ سموگ پر قابو پانے کیلئے مصنوعی بارش کیلئے بھی تیاریاں شروع کر دی ہیں، لاہور میں انسداد سموگ کیلئے سموگ ٹاورز لگائے جائیں گے۔